Исайкинтнэ – кеме ды ялгаксчисэ эриця семиянь алкуксонь невтевкс: вечкить вейсэ оймсеме, яксеме музеев, явить мель спортонтень ды лездыть вейке-вейкенень весемесэ. Тетясь-авась покш ответственность марто трить-кастыть ды тонавтыть эйкакштнень – ламот эйкакштне общеобразовательной школасо тонавтнемадонть башка полочить дополнительной образования, явить мель музыкантень.
Те иень даволковсто Семиянь иенть панжомсто, конань яволявтызе Россиянь Президентэсь, Ольга Петровна пшкадсь республикань руководителентень энялдома марто лездамс цератнень туртов скрипкатнень рамамосо. Артём Здунов топавтызе Ольга Петровнань энялдоманзо – эйкакштненень рамазь колмо инструментт. Саранскоень ды Мордовиянь митрополитэсь Зиновий, сон тонавтнесь скрипкань классонть коряс, ютась стажировка Московонь государственной консерваториясонть ды зярс бути важодсь музыкань преподавателекс, лездась сынст ладямосост.
Исайкинтнэнь семиянтень пшкадемстэ, Мордовиянь Прявтось тешкстызе, течи свалшкань духовно-нравственной ды семиянь питнейчитне пек эрявить обществанть туртов, сынст юрось ды прявт нежесь – самай кеме ды ламо эйкакшонь семиясь.
Ольга Исайкина евтнесь, васенцекс скрипкасо налксеме кармасть покш тейтерьтне Ирина ды Анна – сынь мольсь музыкальной школав, зярдо тонавтнесть уш 5-це ды 6-це класстнэсэ. Ней тейтерьтне тонавтнить Н. П. Огарев лемсэ МГУ-нь медицинань институтонь ветеце курссо. Сынст мельга мольсть цератнеяк – Петя ды Витя. Исайкинтнэнь семиянь кавксо члентнэ налксить музыкань инструменттнэсэ.
Чайде симемстэ семиянь тевтнеде, тонавтнемасо изнявкстнэде кортамодонть мейле ютасть казнетнень явшемантень. Васенце инструментэнть максызь Викторнэнь - Л.П. Кирюков лемсэ Саранскоень музыкальной училищань струнно-смычковой отделениянь студентэнтень. Од инструментсэнть эсь налксеманть - ине композиторонть Иоганн Себастьян Бахонь произведениянть – сон алтызе «Крокус Сити Холлсо» аволь умонь зыянонь жертватнень ледстнемантень. Ялаксозо Илья тонавтни музыкальной школасо.
Вастовоманть прядовомга Артём Здунов ярсесь семиянтень паро эрямо, од музыканттнэнень – уцяска кочказь тевсэнть.
Мордовия Республикань Прявтонь Пресс-службась