Промксонть панжомсто, республикань руководителесь тешкстызе, Мордовиясь кирди домка седейризкс весе масторонть марто вейсэ «Крокус Сити Холлсо» лисезь зыянсонть жертватнень коряс. Маштовозетнень ледстизь чатьмонемань минутасо.
Артём Здунов лемдизе лисезенть покштояк покш зыянокс. «Террористтнэнь каявомань жертвакс кармасть кементь ломанть, аволь ансяк Московонь ды Московонь областень эрицят – улить минек землякткак. Мордовиясь кирди домка седейризкс весе масторонть марто. Следствиясь редясы, кие анокстась-ветясь те тевенть. Сынь печтизь весе границятнень. Минек тевесь – кемекстамс весе тевтнень общественной сэтьмечинь топавтоманть туртов».
Тень пингстэ, кода тешкстызе Мордовиянь Прявтось, эряви ванномс аволь ансяк критической инфраструктурань объекттнэнь, истя жо ламо ломанень пурнавома таркатнень.
Общественной мероприятиятнень ютавтоманть пингстэ сэтьмечинь ванстомань кевкстеманть коряс пачтясть МР-ва МВД-нь, Росгвардиянь, МР-ва Россиянь МЧС-нь Главной управлениянь, истя жо республикань министерстватнень представительтне.
Республикань Прявтось макссь кармавтомат ламо ломанень улема марто объекттнэсэ сэтьмечинь топавтоманть коряс. Объекттнэсэ арсеви ютавтомс тренировкат идемань службатнень марто экстренной тевтнень пингстэ тевдеемань коряс.
Мордовия Республикань Прявтонь Пресс-службась