Коллегиянь промксось ушодовсь Саранск ошонь округсо ды Лямбирень муниципальной районсо «Система» экономикань башка зонань теемадо Весладямонь тешкстамостонть. Экономикань башка зонань теемась – региононть туртов историянь тев, сон топавтови Президентэнть, Россиянь Федерациянь Правительстванть ды Россиянь Минэкономразвитиянть кирдемаст вельде.
Коллегиянь важодемасонть ульнесть Беларусь Республикань Налогтнень ды сбортнэнь коряс министрась Сергей Наливайко, РФ-нь Экономической виевгавтомань министрань полавтыцясь Дмитрий Вахруков, Россиянь Минэкономразвитиянь Региононь политикань департаментэнь прявтось Дмитрий Косткин. Сергей Наливайко тешкстызе, мелят Мордовия Республиканть ды Беларусь Республиканть ютксо товарооборотось кассь кавксть, ды евтась кемема, вейсэнь тевдеемань енкстнэ улить келейгавтозь.
Пачтямо марто коллегиясонть пшкадсь МР-нь Экономикань, микшнемань ды предпринимательствань министрань тевтнень топавтыцясь Иван Горин. Сон тешкстызе, мелят республикась невтсь вадря касома весе прявт енкстнэнь коряс. Промышленной производствань индексэсь – 108%, велень хозяйствань продукциянь производствась - 105%, прявт капиталс инвестициятне – 112%. Республикасонть тееви экономикань башка зона, келейгавтови «Рузаевка» икельдиця виевгавтомань территориясь. «Инвестортнэ а пелить путомс ярмакт Мордовияв», – мерсь Иван Горин.
Республикань Прявтось тешкстызе, инвестклиматонь, бизнесэнь ветямонь условиятнень ветямонь вадрялгавтомань коряс важодемась улезэ поладозь. «Мордовиясо вадрясто нолдазь тевс региононь инвестициянь стандартось. Эряви нолдамс тевс инвестандартонь лувтнень муниципальной уровнясояк», – кармавтсь Артём Здунов. Меельце иетнестэ республикасонть ламолгадсь предпринимателень секторось, ламолгадыть самозанятойтне. Те лувонть эряви поладомс, тень туртов эряви эрязасто нолдамс тевс вишка ды средней бизнесэнь кирдемань весе енкстнэнь, васняяк – региононь фондтнэнь (Предпринимательствантень лездамонь фондонть ды Гарантийной фондонть). Мордовиянь Прявтось тешкстызе Регионъютконь ды раськеютконь вейсэнь тевдеемань виевгавтоманть, бизнес-миссиятнень анокстамонть. Те иестэнть, невтемакс, арсеви ютавтомс бизнес-миссият Китаев ды Казахстанов.
Россиянь Минэкономразвитиянь Региононь политикань департаментэнь прявтось Дмитрий Косткин тешкстызе: «Региононь од команданть важодеманзо вельде Мордовиянь экономикась полады виевгадомо».
Бизнес-сообществатнень ды государственной властень органтнэнь лезэнь кандыця вейсэнь тевдеемадонть евтнесь Мордовиянь Промышленниктнень ды предпринимательтнень вейсэндявксонь исполнительной прявтось Алексей Захаров. «Спрутс» ООО-нь генеральной прявтось Александр Ширяев евтнесь «Тюштян» региононь брендэнь оршамопелень теемань коряс опыттэнть. Инжень вастомань енксонть виевгавтомадонзо евтнесь Radisson Hotel финансонь прявтось Антон Русаков.
ДОМ.РФ представительтне невтизь Темниковань енксонь мастер-планонть. Ледстясынек, масторонь Президентэнть кармавтоманзо коряс моли важодема те тарканть «Арзамас - Дивеево – Саров» паломникень кластерэнтень совавтоманть коряс. Мастер-планось, конань анокстызе ДОМ.РФ, тешксты социально-экономической виевгавтомань прявт лувтнень ды енкстнэнь. Мастер-планонь анокстамонть пингстэ теезь онлайн-платформа, косо райононь эрицятненень меревсь кадомс эсест мелест-арсемаст. Истя жо ютавтозельть стратегической сессият экспертнэнь ды Темниковань енксонь эрицятнень марто.
Мордовия Республикань Прявтонь пресс-службась