Июнень 19-це чистэ Саранскойсэ "Мордовия Арена" стадионсонть ютавтовсь FIFA 2018 Футболонь коряс масторлангонь чемпионатонь Колумбиянь - Япониянь сборнойтнень ютксо матчось. Вастовомась прядовсь 1:2 счётонть марто Акир Нишинонь прявтсо сборноенть лезэс. Матчонть прядовомадо мейле пресс-конференциясонть прессанть икеле кортасть Япониянь сборноень прявт тренерэсь ды каявицясь Юя Осака.
"Уш ушодовомсто минь невтинек кежейчинек, - тешкстызе Япониянь 63 иесэ специалистэсь. - Минек ульнинек вейке налксицядо седе ламонек, те, нама, лездась тенек. Ансяк миненек эряви улемс виевекс аволь ламочинть, налксеманть коряс. Кона бути шкастонть икелев молеманть саизе Колумбия. Васенце пельксэсь миненек эзь удала.
Омбоце таймстэнть, зярдо паксянтень лиссь Хамес, учинек эрьва мезе. Ансяк минек командась важодсь парсте. Минь пштистэ ванынек осканть мельга оймсема шканть самс. Секскак миненек удаласькак изнямс".
Япониянь сборноень прявт тренерэсь башка тешкстынзе кавто налксицятнень - Инуи ды Кагава. "Сынь пек вадрясто невтизь пряст кода башка-башка, истя жо вейсэнь налксемасо", - мерсь Акира Нишино.
Кевкстеманть лангс, кода Япониянь сборноесь тешкстасы изнямонть? Япониянь специалистэсь тешкстызе, сыненст зярс аволь тень эйс. "Турнирэсь ансяк ушодовсь, ды меельце матчтнэ кармить минек туртов варчавксокс, - мерсь Нишино. - Те весемезэ колмо очкат. Меельценть кадсынек минек ваныцятнень питнес".
28 иесэ каявицясь Юя Осака, конась налкси немецень "Вердерэнь" кисэ, ёвтазь матчонь сехте вадря налксицякс. Журналисттнэнь марто кортамсто Юя мерсь, чавомс гол масторлангонь чемпионатсонть ульнесь сонзэ эйкакшпорань бажамокс.
"Ней мон уцяскаван, - мерсь Осака. - Минек икеле аштесь прявт тев: улемс ёроковокс, ветямс налксеманть. Арсян, минь весементь топавтынек. Ды карматано бажамо седе товгак саемс вадря результатт".
Колумбиянь сборноень прявт тренерэсь Хосе Пекерман истя кортась Япониянь марто вастовомадонть.
"Малав весе матчонть перть минь ульнинек седе аламонек. Колумбиянтень удалась чавомс гол васенце таймстонть. Оймсемадонть мейле минь эзинек туе каявомас, бажинек теемс стакачить япониянь ортатнень вакссо, ансяк редявсь сиземась. Ды минек изнимизь. Мезе мон ёвтан Саранскойденть? Вадря ош, пек паро стадион. Берянь, минь эзинек кандо ламо кенярксчи минек ваныцятнень туртов, конат састь тей. Течинь налксемась карми вейкине берянь мельследемакс те ошонть коряс, ансяк пек паро азортнэнь туртов те кодаяк а кандови".
Тешкстасынек, Япониянь сборноенть кирдеме сась сонзэ Императоронь Высочествась Япониянь Принцессась Хисако Такамадо.