Июнень 19-це чистэ "Мордовия Аренасо" ютавтовсь Россиясо FIFA 2018 Футболонь коряс масторлангонь чемпионатонь омбоце матчось, косо вастовсть Колумбиянь ды Япониянь сборнойтне.
Матчонтень сакшнось FIFA-нь Президентэсь Джанни Инфантино. Покш инженть вастызе Мордовиянь Прявтось Владимир Волков. Республикань Прявтонть марто кортамсто FIFA-нь Президентэсь макссь покш питне футболонь первенствантень региононть вадрясто аноктсамонтень, тешкстызе, Саранскоесь - пек ванькс ды мазый ош.
Владимир Волков: "Аэропортсто стадиононть видьс ардомсто минь ветинек господин Инфантинонь туртов аволь покш экскурсия: невтинек Тавла неень шкань микрорайононть, ошонь историянь куншкакуронть, од зданиятнень, Оперань ды балетэнь театранть, Тёжа иень площаденть, фонтантнэнь, истя жо стадиононть маласо од лейчиренть".
"Неяви, те аволь вейке чинь ды Мордовиянь ламот эрицятнень важодемаст", - макссь питне неезентень Джанни Инфантино.
"Мордовия Аренасо" Колумбиянь-Япониянь ютксо матчсонть покш инжетнень ютксо ульнесть Япониянь Принцессась Хисако Такамадо, «Россия-2018» Оргкомитетэнь председателесь Аркадий Дворкович, «Россия – 2018» Оргкомитетэнь генеральной прявтось Алексей Сорокин.
"Мордовия Аренас" омбоце матчонтень сакшность 40 842 ваныцят.
Мордовия Республикань Прявтонть пресс-службась