Середасто, маень 24-це чистэ, Мордовиянь Прявтонь тевтнень нурька шкас топавтыцясь Владимир Волков ульнесь Технопарконь Научно-технической советэнь промкссонть, конась ютавтовсь Саранскойсэ.
НТС-участниктне кортызь зярыя кевкстематнень, конат примазельть 2016 иень маень 12-це чистэ «Технопарк-Мордовия» АУ-нь Научно-технической советэнь промкссонть, истя жо инновациятнень лангс, кода конкурентноспособной экономиканть касомастонь-кепетемань прявт факторонть, вешематнень кастоманть.
РАН-нь академикесь, Технопарконь Научно-технической советэнь председателесь, «Всероссийский научно-исследовательский институт авиационных материалов» ФГУП-нь генеральной прявтось, РФ-нь государственной научной центратнень Ассоциациянь президентэсь Евгений Каблов промксонть панжомсто тешкстызе, мероприятиянь участниктне Саранскойсэ ульнесть зярыя объектнэсэ, конат сюлмавозь инновациянь научно-производственной кластерэнть марто. «Наукоёмкой од предприятиятнень лезэв важодемась кемексты, региононь руководстванть ды Технопарконь НТС-нь вейсэнь важодемась канды вадря результатт», - мерсь сон.
«Вете иетнень перть Мордовиянь Технопаркось Научно-технической советэнть марто вейсэ сайсь покш изнявкст. Сон саи 7 тарка Россиянь 100 сехте вадря Технопарктнэнь ютксо. Сон лезды республиканть, народной хозяйствань отраслятнень виевгавтомантень. Минек Технопарконть покш путовксозо волоконной оптикань кластерэнть теемасо, светотехникань отраслянь науканть касомасо-кепетемасо ды ламосо лиясо. Башка мель явови ёроков эйкакштнень марто важодемантень. Кемекстазь важодемань кеме сюлмот РОСНАНО-нть марто. Технопарконть лезэв важодемазо кемекстави сеньсэ, сонзэ резиденттнэ нолдыть продукция 6 миллиардто ламо целковойс. Ды тесэ роботыть кавто тыщадо ламо ломанть», – ёвтнесь Владимир Волков.
Мордовиянь Прявтонь тевтнень нурька шкас топавтыцянть валонзо коряс, предприятиятне, конат арсить касомс-виевгадомс, нолдыть тевс инновациянь производстванть. Продукциянь экспортось колмо иетнень перть кассь малав кавтос ды пельс, седе покш пельксэсь пачтяви Европань мастортнэс. Виевгадомань прявт ёнксокс ашти импортонь полавтыця продукциянть нолдамось. Республикась масторсонок ашти васенце таркатнесэ инновациянь продуктонь нолдамонть коряс, те 28 %.
«Питнентнень мельс саезь промышленной производствань касомась 2016 иестэ кармась 7%, велень хозяйствась – 7%, ВВП-сь – 4%. Зарплатась кассь 6,5%, инфляциясь кармась 4,8%, – толковизе В.Д.Волков. – Те иень васенце кварталсонть промышленной производствань индексэнь касомась кармась 20%, 6 % – велень хозяйствась, покшолгавтовить инвестициятне прявт капиталс.
Истя жо Владимир Волков тешктсызе, республикасонть ёроков эйкакштнень марто важодемась ветяви системань лувсо. Ёроков эйкакштнень туртов республикань лицеесь кармась инновациянь площадкакс, косо нолдавить од ёнкс тонавтомасонть. Тесэ ютыть анокстамо неень шкань экономиканть туртов эрявикст отраслятнень, истя жо инженерно-техническойть, сы шкань специалисттнэ.
«Российский фонд фундаментальных исследований» ФГБУ-нь советэнь председателесь Владислав Панченко тешкстызе, од учёнойтненень яви лезкс Фондось. Сеедьстэ те сеть проекттнэ, конатнень вельде решавить башка региононть социально-экономической стакачитне. «Минь учотано Мордовиянть пельде од мельть-арсемат, конатненень минь апак кавтолдо лездатано», – мерсь сон.
Пачтямо марто пшкадсь Россиянь Федерациянь Президентэнь региононь экономикань интеграциянь кевкстематнень коряс советникесь, экономикань наукань докторось, профессорось, РАН-нь академикесь Сергей Глазьев.
«Экономикасо стакачитнень лангс апак ванно Мордовиясь виевстэ моли икелев. Тесэ вадрясто топавтовить Россиянь Президентэнть путовт задачатне, конат сюлмавозь инновациятнень марто. Весе те инновациянь подходонь топавтомань результат, республикасонть научно-технической касомань-кепетемань прявт факторокс ашти научно-технической прогрессэсь ды тень коряс важодемась ветяви школасто саезь. Производствань прявт факторокс ашти ломанесь. Республикасонть покш важодема ветяви од ломантнень марто, тень коряс уш ули лезэ. Ёроков эйкакштнень туртов республикань лицеень прядыцятне сыть роботамо Технопарков. Ладязь инновациянь продукциянь серийной нолдамось. Те се, мезесь эряви ёроковсто виевгадыця регионтнэнень», - мерсь Сергей Глазьев.
Россиянь Президентэнь советникесь тешкстызе, виевгавтомань инновациянь кись сюлмавозь квалификациянь свалшкань кастоманть марто. Тень туртов вишкинестэ саезь тонавтыть тиринь масторонь вечкеме. Тень коряс невтевксэкс ашти Мордовиясь «школа-вуз-технопарк» теезь системанть марто.
Промксонть юрсо Владимир Волков казсь государственной наградат Технопарконь Научно-технической советэнь членттнэнень, содавикс учёнойтненень, РАН-нь академиктнень. Мордовиясо инновациянь инфраструктурань виевгавтомасо покш путовксонть ды ламо иень перть вейсэнь важодеманть кисэ Славань III степенень Орденсэ казевсть «Санкт-Петербурский национальный исследовательский университет информационных технологий, механики и оптики» высшей образованиянь федеральной государственной образовательной учреждениянь ректорось, технической наукань докторось, профессорось, Россиянь наукань академиянь член-корреспондентэсь Владимир Васильев, «Российский фонд фундаментальных исследований» федеральной государственной бюджетэнь учреждениянь советэнь председателесь, физикань-математикань наукань докторось, профессорось, Россиянь наукань академиянь (Москов ош) академикесь Владислав Панченко. Республикань научно-технической ды экономической виевгавтомантень покш путовксонть кисэ «Заслуженный деятель науки Республики Мордовия» Почётной лемесь максовсь «Всероссийский научно-исследовательский институт авиационных материалов» федеральной государственной унитарной предприятиянь генеральной прявтонтень, «Технопарк-Мордовия» автономной учреждениянь Научно-технической советэнь председателентень, технической наукань докторонтень, профессорнтень, Россиянь наукань академиянь (Москов ош) академикентень Евгений Кабловнэнь.