Мордовиянь Прявтось Владимир Волков ютавтсь вастовома «РМ Рейл» компаниянь генеральной директоронть Павел Овчинников марто. Кортасть холдингень предприятиятнень 2016 иень важодемань невтевкстнэде ды сы шкань тевтнеде.
Павел Овчинников ёвтнесь Республикань Прявтонтень, 2016 иестэ вагононь нолдамонь покшолматне кассть 55 процентс, покш вагононь валомань производствась кассь колмоксть. Республиканть пельде явозь лезксэнть вельде удалась витемс тевтнень зарплататнень пандоманть коряс, ванстомс вадря специалисттнэнь. Диверсификациянь виев программась, конань топавтомо компаниясь ушодсь 2014-2015 иетнестэ Мордовия Республикань Правительстванть лезксэнзэ вельде, васенцеде макссь редявикс результатт. Невтемга, «ВКМ-Сталь» ООО-сь келейгавтынзе покш, средней ды вишка валомань номенклатуранть 30 саезь 450 видьс ды течи ловови федеральной нефтехимиянь, велень хозяйствань ды автомобилень отраслянь предприятиятнень прявт поставщикекс.
Компаниясь кемекстызе тарказо раськеютконь рынкасонть: пачтявсть вагонт ды комплектующейть Иранов ды Кубав, виевгавтовсь вейсэнь важодемась Балтиянь ды Казахстанонь предприятиятнень марто.
Мордовиянь Прявтось тешкстызе, 2017 иестэ компаниясь поладсы вагононь инновациянь моделень нолдамонть ды производствань покшолматнень арси кастомс 25-30 процентс, теке марто, кирдемс производствань диверсификациянь ёнксонть.
Мордовиянь Прявтось тешкстызе холдингень предприятиятнень седе тов важодемаст эрявиксчинть. «РМ Рейл» заводтнэнь важодемась эрявикс кода Рузаевканть, истя целанек республиканть туртов. Эряви теемс весементь 2017 иестэ вадря полавтоматнень ванстомга, предприятиятне важодевельть весе вийсэст, касоволь зарплатась, панжовольть важодемань од таркат»,– мерсь Владимир Волков.
Мордовия Республикань Прявтонть пресс-службась