Январень 18-це чистэ Мордовиянь Прявтось Владимир Волков вастовкшнось Куйбышевень чугункань кинь прявтонть Рашид Сайбаталов марто. Сынь тешкстасть 2017-2019 иетнес Мордовия Республиканть ды «РЖД» ОАО-нть юткссо вейсэнь важодемадо соглашения.
Соглашениянтень совавтозь Мордовия Республикань социально-экономической виевгавтомань ды регионсонть «РЖД» ОАО-нть свалшкань важодемань ладямонть коряс прявт вешематне.
Документсэнть башка мель явозь чугункань кинь инфраструктурань объекттнэсэ транспортонь сэтьмечинть ванстомантень. Невтемга, республикасонть совавтвои эрямос «Безопасный регион» программась, конанть лувсо чугункань кинь покш переездтнэс путовить фото- ды видефиксацият, те лезды редявикстэ киртямс правань коламотнень автомобилень ды чугункань китнесэ.
Соглашениясонть истя жо тешкстазь бажамось поладомс важодеманть 2018 иень Футболонь коряс мирэнь чемпионатонть Мордовия Республикасо ютавтоманть туртов Саранскоень ды Рузаевкань чугункань кинь объекттнэнь анокстамост коряс. Те кевкстеманть ванкшномсто Республикань Прявтось Владимир Волков тешкстызе Саранскойсэ ды Рузаевкасо чугункань кинь вокзалтнэсэ ялго ютамонь сэдьтнень-печтематнень одкстомтомань эрявиксчинть. Рашид Сайбаталов алтась саемс те кевкстеманть башка ванновт алов, совавтомс тень туртов эрявикс расходтнэнь «РЖД» ОАО-нь инвестициянь программатнень юткс.
Вастовомасонть истя жо мольсь кортамо вейсэнь важодемань кевкстематнеде. Невтемга, ветявсь кортамо чугункань кинь транспортсонть пачтявиця сталмотнень покшолгавтомадост. Мордовиянь Прявтось тешкстызе, 2016 иень итогтнень коряс, республикасонть промышленной производствань касомась кармась 108% ютазь иень теке шкань питнетнень коряс, тень пингстэ Мордовиянь продукциясь рамсицятненень седе сеедьстэ пачтяви автомобилень транспортонть вельде. Тень кувалма республикань Правительствантень кармавтозь ванкшномс вейсэнь важодемань ёнкстнэнь чугункань кинь транспортонть тевс нолдамга лия регионтнэс Мордовиянь перерабатывающей покш холдингтнень продукцияст пачтямга.
Мордовия Республикань Прявтонть пресс-службась