Декабрянь 6-це чистэ Республикань Кудосо ютавтовсь «Актуальные вопросы развития муниципальных образований Республики Мордовия» теманть коряс муниципальной райононь прявттнэнь марто семинарось-промксось. Тосо ульнесть Мордовиянь Прявтось Владимир Волков, МР-нь Государственной Собраниянь Председателесь Владимир Чибиркин, Мордовиянь Правительствань Председателесь Владимир Сушков, МР-нь Прявтонь Администрациянть руководителесь Андрей Богатов, Мордовиянь муниципальной районтнэнь ды Саранск ошонь округонь прявттнэ, истя жо республикань государственной властень исполнительной органтнэнь прявттнэ.
Семинаронть-промксонть панжомсто Владимир Волков тешкстызе, иень икелепелень итогтне невтить вадря полавтоматнень экономикань весе прявт ёнкстнэнь коряс, ансяк эряви вадрясто анокстамс важодемань аравтлувонть 2019 ды меельце иетнес. Региононь Прявтось башка мель явсь «О национальных целях и стратегических задачах развития на период до 2024 года» Россиянь Федерациянь Президентэнть В.В.Путинэнь Указонзо топавтоманть лангс, ёвтынзе прявт ёнкстнэнь ды тевтнень, конатнень топавтомс эрявить вейсэнь вийть.
Мордовиянь Прявтось тешкстызе, раськень проекттнэнь эйстэ лезэвчись ламосо ашти республикань районтнэсэ важодеманть эйстэ. "Вадря результатт миненек эряви саемс аволь башка учреждениятнесэ, а весе таркатнесэ, косо эрить ломанть: оштнесэ, посёлкатнесэ ды велетнесэ. Миненек эряви, тевтне полавтовост вадря ёнов, ломатне неевлизь ды редявлизь сеть полавтоматнень эсест лангсо, аволь конёвтнень лангсо ды отчёттнэсэ.Тень эйстэ ашти, кодамо питне ломантне максыть валстень органтнэнь ды башка прявттнэнь важодемаст туртов", - тешкстызе республикань Прявтось.
Мордовиянь Прявтось истя жо ёвтынзе сеть тевтнень, конат аштить муниципальной образованиянь прявттнэнь икеле. Васняяк, те од эрямо таркатнень строямось, ташто кудосто одс ломантнень ютавтомась, китнень витнемась ды строямось, коммунальной инфраструктуранть одкстомтомась, коммунальной калгодо отходтнэнь од лувсо пурнамось, муниципальной образованиятнень инвестициянь тевтнень вадрялгавтомась, бюджетэнь эсест доходтнэнь кастомась. Прявт тевекс жо ёвтазь ломантнень доходост кастомась ды эрямонть кувалгавтомась.
"Нама, тесэ эрявить вейсэнь тевть, - тешкстызе Владимир Волков. - Чачтоманть ламолгавтомась кодаяк а топавтови, бути а улить вадря зарплата марто важодемань таркат, рамавиця эрямо таркат, вадря образования ды медицинань лезкс. Прявт ёнксось - зарплататнень кастомась. Минек тевенек - совамс зарплатань коряс масторонь васенце 50 регионтнэнь юткс. Миненек эряви алкуксонь касома. Республикасонть пурнави важодемань башка вейсэндявкс, конань прявтсо Правительствань Председателесь В.Ф.Сушков. Ваннови эрьва предприятиянь зарплатась - кода прявттнэнь, истя важодицятнень. Минь а мольтяно каршо, штобу прявттнэнь улевель покш зарплатаст, сестэ сон пандозо важодицятнененьгак, кастозо важодемань лезэвчинть".
Республикань Прявтось ледстизе промксонтень пурнавозетненень, путозь покш тевтнень прявт результатокс улест эрьва ломаненть, эрьва семиянть эрямосо вадря полавтоматне: "Ломантне редяст вадря ёнов полавтоматнень - вана мезе прявтось!"
Мордовия Республикань Прявтонть пресс-службась