Мордовиянь Прявтось Владимир Волков ёвтась поздоровт Мордовиянь военкоматонь важодицятненень

Мордовиянь Прявтось Владимир Волков ёвтась поздоровт Мордовиянь военкоматонь важодицятненень

Пецясто, апрелень 13-це чистэ, Мордовиянь Прявтось Владимир Волков ульнесь кенярксчинь промкссонть, конась алтазель Россиянь ды Мордовиянь военной комиссариатонь системань теемантень 100 иетнень топодемантень. Раськень драмань театрантень пурнавсть республикань военкоматонь важодицятне ды ветерантнэ.

Военной комиссариатнэ сайсть покш талика Ине Отечественной войнань иетнестэ. Сынст важодицятнень эсь тевентень пряст максоманть вельде удалась куроктсо ютавтомс мобилизациянть, пештемс войскатнень техникасо ды ресурстнэсэ, нурька шкас анокстамс армиянть, конась стясь Тиринь масторонть ванстомо. Фронтовиктнень ды тылэнь важодицятнень подвигест марто вейсэ те кармась прявт тевтнестэ вейкекс, мезесь лездамс саемс Ине Изнямонть.

«Тынк службанк – государстванть обороноспособностенть прявт пелькстнэстэ вейкесь. Весе иетнень перть военной комиссариаттнэ сюлмавозь минек армиянть виевгавтомань историянть марто, вадрясто топавтыть Вооруженной вийтнень пештемань покш тевтнень», – пшкадсь пурнавозетненень Владимир Волков.

Кода текшстызе республикань Прявтось, покштояк покш важодема военкоматось топавтсь войскатнень пурнамга, конат топавтсть интернациональной долгост Афганистансо, ульнесть Чернобылень АЭС-сь авариянть ликвидациясо, ванстсть Северэнь Кавказсо масторонть вейкетьксчинзэ.

«Ней Россиясо тееви Вооруженной Вийтнень од чачось. Ютавтовить покш тонавтомат, кастови боевой анокчинь уровнясь. Од ломантнень ютксо касы армиясо служамонь престижесь. Сехте прявтось – минь весе карминек кирдеме каштанчи минек военнойтнень, армиянть ды флотонть, боевой операциятнесэ сынсь изнявксост коряс», ­– тешкстызе Мордовиянь Прявтось.

Владимир Волков ледстизе, Россиянь Президентэсь В.В.Путин эсь Кучомасонзо тешкстызе минек масторонь военной касыця виенть. «Тень пингстэ сон башка тешкстызе, оружиянь ды боевой техникань сехте од образецтнэнь весе таликаст пингстэ Россиянь армиянь прявт виекс ашти сонзэ солдаттнэнь ды офицертнэнь покш содамочист-маштомачист, профессионализмаст ды моральной духост, патриотизмаст ды боевой койтненень кемечист», – мерсь Мордовиянь лидерэсь.

Неень шкань условиятнесэ республикань военной комиссариатось лезэвстэ топавты путозь тевтнень. Ансяк ютазь иестэ Мордовиясто армияв саезь 2 тёжадо ламо од цёрат, конат служить Калиниградсто саезь Владивостоконть видьс весе войскатнесэ.

«Тешкстаса, минек призывниктнень эйстэ малав 40% пачтязь Вооруженной Вийтнень элитань частнес – воздушно-десантонь ды воздушно-космической войскатне, Военно-Морской флотось, Нацгвардиясь, наукань ды спортонь ротат, – тешкстызе Мордовиянь Прявтось. – Касы высшей образования марто армияв саезетнень пельксэсь. Те седеяк эрявикс армиянть одкстомтоманть пингстэ. Неень шкань вооружения марто важодеманть туртов эрявить превей ды анокстазь ломанть. Теде башка, минек республикасто 300 ламо курсантнэ ней тонавтнить масторонь высшей военной тонавтнемань заведениятнесэ».

«Минек ладязь ялгаксчинь ды деловой кеме сюлмот воинской ламот подразделениятнень марто, косо служить Мордовиянь призывниктне», – тешкстызе Владимир Волков.

Кода мерсь республикань Прявтось, Мордовиянь призывниктнень служамо таркатнестэ сыть пек вадрят мельть-ёвтамот. Командиртнэ тешкстыть цёратнень вадря анокстамост ды морально-волевой покш качестваст.

Властень органтнэнь ды военной комиссариаттнэнь вейсэнь важодемаст вельде республикань призывниктнень годностест 83,5% ламо. Уш зярыя иень перть те невтевксэсь масторонь келес сехте покштнень ютксо.

«Минь кемтяно, бути од ломантне кармить касомо шумбракс, виевекс ды дисциплинань топавтыцякс, путозь тевтнень топавтомо маштыцякс, сестэ сынь вадрясто невтсызь эсь пряст Отечествань ванстомань тевсэнть, ды сэтьме важодемасонть. Ды тесэ васенце таркас лиси военно-патриотической важодемась, конань тынь ютавтадо од ломантнень марто», – мерсь Владимир Волков.

Мордовиянь Прявтонть валонзо коряс, самай военкоматсто од ломантнень туртов ушодови армиясь, покш эрямос кись. Кода мерсь Владимир Волков, седе, кода вастсызь призывникенть, ламосо ладяви сонзэ мелезэ-арсемазо военной службадонть, Вооруженной Вийтнеде.

«Тынк лангс, военкоматонь важодицят, ваныть од ломантне, тынк эйсэ сынь неест пример, – тешкстызе Мордовиянь Прявтось. – Монень мельспаро тешкстамс, те залонтень пурнавозь военной комиссартнэ, гражданской персоналось, ветерантнэ – те ламосо – вадрясто анокстазь, ответственной ломанть, эсь тевень алкуксонь профессионалт».

Течи республикасонть ёроковсто виевгавтови «Юнармия» движениясь, ков совить 3 тёжадо ламо боецт. Теезь кадетэнь ды казаконь классонь келей сетть, косо тонавтнить малав 4,5 тёжат эйкакшт. Редявикс лезкс сыненст явить военкоматнэ ды ветеранонь организациятне.

«Минь, апак кавтолдо, поладтано лездамо юнармиянь, кадетэнь, волонтёронь ды вешнемань движениятненень, карматано виевгавтомо спортонь технической ды военно-прикладной видтнэнь, армияв саемадо икеле анокстамонь системанть», – мерсь Владимир Волков.

Республикань Прявтось тешкстызе, сонзэ башка ванновтонзо ало минек ёнксо чачозетнень лемест пингеде пингес ванстомась, воинэнь мемориалтнэнь вадрялгавтомась, ветерантнэнень, сыре ломантненень свалшкань мелень явомась. Меельце иетнестэ Мордовиясо ютасть ламо кенярксчинь покш мероприятият, конат тейсть редявикс путовкс патриотизманть ды воинской службань авторитетэнть кемекстамонтень.

Сон башка тешкстызе, мелят Саранскойсэ ютавтовсть Отечествань Героень Чинтень алтазь кенярксчить. Мордовиясь вастсь инжеть Равчирень федеральной весе округстонть.

Те кенярксчинтень вадря казнекс кармась Россиясо васенце проспектэнть панжомась, конанень максозь Россиянь Армиянь лемесь. «Ней минек ули эштё вейке вадря меленек. «Юбилейный» микрорайононть ваксс теемс «Патриот» тематикань парк, косо кармить военной техникань образецт, тир, мереви ветямс историянь реконструкцият, – мерсь Владимир Волков. – Те пек вадря проект од ломантнень военно-патриотической лувсо кастоманть туртов. Ды минек улить кортамонок Россиянь Оборонань министерстванть марто».

Мордовиянь лидерэнть ванновтонзо коряс, ломантне кортыть военной комиссариаттнэнь важодемадост призывенть коряс, те жо айсбергэнть ансяк неявиця пельксэсь.

«Военкоматонь важодицятнень арасть омбоце пельксэнь тевест – улезэ те воинской учётонь анокстамось ды ветямось, военнослужащейтнень ды сынст семиянь члентнэнь социально-бытовой кевкстемаст ладямось, военной пенсионертнэнь ды отставниктнень марто важодемась, Ине Отечественной войнань ветерантнэнень, воинтнэнень-интернационалистнэнень лездамось. Весе те пек ламо важодема, – мерсь республикань руководителесь. – Ды течи мон ёвтан сюкпря тенк весенень те эрявикс важодеманть кисэ! Эштё весть ёвтан поздоровт юбилеенть коряс Мордовия Республикань военной комиссариатонь важодицятненень ды ветерантнэнень, военной управлениянь местной органтнэнень! Кеман, тынь поладтадо вадрясто топавтомо лангозонк путозь тевтнень Россиянь Федерациянь Вооруженной Вийтнень боевой ды мобилизациянь тевтнень коряс! Седейшкава арсян тенк кеме шумбрачи, семиясо паро эрямо, службасо од изнявкст ды сэтьме менель прянть велькссэ!»

Кенярксчинь промксонтень сакшность ды тешкстызь масторонь обороноспособностенть кемекстамосо военной комиссариатнэнь покш путовксост МР-нь Государственной Собраниянь Председателень полавтыцясь Валерий Алехин, Саранск ошонь округонь прявтось Петр Тултаев, Саранскоень ды Мордовиянь митрополитэсь Зиновий, Россиянь Вооруженной вийтнень Генеральной штабонь Прявт организационно-мобилизациянь управлениянь группань прявтось полковникесь Сергей Бикеев.

Военкоматонь зярыя важодицятне ды ветерантнэ тешкстазь ведомствань ды республикань наградасо.