Мельвановикс ялгат!
Республикась виевстэ бороци коронавирусонь инфекциянть каршо.
Нейтянок, меельце недлятнестэ тевтне вадрялгадсть, од сэредицятне киртявить. Те весе тестированиянть ламолгавтоманть пингстэ. Седе ламо ломанть нолдавить больницясто.
Тень лувсонть Роспотребнадзорось мерсь тенек ютамс ограничениятнень каямонь омбоце пельксэнтень. Ней минь топавтанок эрявикс весе невтевкстнэнь.
Секскак медьковонь 7-це чистэнть саезь минь эскельдинек омбоце этапонтень, конань коряс панжовить аволь ярсамопелень микшниця покш лавкатне, конатнень покшолмаст 800 кавонзазь метрадо седе ламо, одкстомтови ушотнесэ микшнемась ды рынкатнень важодемась. Тонавтомань куншкакуротненень мереви ушодомс важодемаст.
Истя жо минь мердянок общественной ярсамопелень предприятиятненень панжомс кизэнь панжадо верандатнень. Ансяк Роспотребнадзоронь весе вешематнень топавтоманть пингстэ, стольтнень ютксо кадовозо эрявикс тарка, топавтовозо социальной дистанциясь. Бути эпидситуациясь карми свалшкань, каявить весе ограничениятне кафетнень ды ресторантнэнь важодемаст коряс. Ансяк капшамс неть кевкстематнесэ а эряви.
Ограничениятнень каямонь од этапось илязо ветя эпидситуациянть стакалгавтомантень. Вирусось ковгак эзь туе. Секскак санитарно-эпидемической сэтьмечинь ламот вешематне, маскатнень ды перчаткатнень кнадтнемась, социальной дистанциясь кадовить микшнемань, услугань сферань весе объекттнэсэ, транспортсо, ломанень пурнавома таркатнесэ. Пштистэ эряви топавтомс санитарной вешематнень предприятиятнесэ ды важодемань коллективтнесэ.
Эштё весть ёвтаса: ограничениятнень седе тов каямось карми сюлмавозь санитарно-эпидемической сэтьмечинь вешематнень пштилгавтоманть марто. Важодема таркань эрьва максыцянтень, тевдеемань эрьва сферанть туртов Роспотребнадзорось аноктсась пшти вешемат, конатнень эряви топавтомс. Минь карматанок пштистэ ваномо тень мельга.
Неинек, санитарной вешематнень топавтомаст пингстэ инфекциянть ламолгадомань тандавкстнэ киртявить.
Тень эштё весть невтизе Россиянь Конституцияс полавтоматнень совавтомань коряс Весероссиянь вайгелень максомась. Сень вельде, вайгелень максоманть пингстэ республикасонть топавтовсть санитарной сэтьмечинь весе вешематне, корнавирусось миненек эзь меша.
Кочкамонь участкатнес сакшность 79% ламо кочкицятне, те Мордовиянь 408 тёжадо ламо эрицят.
Ёвтан сюкпря республикань эрицятненень ёроков гражданской позициянть, масторонь ды республиань вандынь чинть кисэ мелявтоманть кисэ.
Кенярдовты, участкатнес сакшность ламо од ломанть, студентт, эйкакш марто семият. Ломантне максызь вайгелест эсест ды эйкакшост вандынь чинть, вадря ёнов полавтоматнень кисэ. Масторонть кисэ, конань вечксызь ды косо бажить эрямс.
Башка сюкпря ветерантнэнень, сыре ломантненень, конатнень оймест сэреди Тиринь масторонть кисэ, сынь максызь вайгелест сонзэ виевчинть, эсест нуцькаст паро эрямонть кисэ.
Сонсь кампаниясь ютась сэтьме лувсо, вайгелень максомась ульнесь неявицякс, сонзэ результаттнэ видеть.
Секскак мон ёвтан сюкпря важодеманть кисэ вайгелень максомань весе анокстыцятненень – кочкамонь комиссиянь, Общественной палатань члентнэнень, ваныцятненень, волонтертнэнень, медработниктненень, правань ванстомань органонь, коммунальной службань важодицятненень, СМИ-ненень, властень органонь важодицятненень.
Весероссиянь вайгелень максомань итогтне невтизь, минек обществасонть ванстови вейкень вейкень чарькодемань лувось. Икелев эскелеманть туртов минек ули весемесь. Ули прявтось – Тиринь масторонь уцясканзо полавтомасонть, покш тевтнесэ, конат аштить Россиянть ды Мордовиянть икеле, эрицятнень улемаст бажамось.
Ней прявтокс ашти минек вейкетьксчинть ванстомась, весе стакачитнень каршо бороцямосонть виевчинть невтемась. Ды, васняяк, коронавирусонть каршо бороцямосонть, штобу седе куроксто велявтомс икелень эрямонтень. Эдь зярдо минь вейсэ кундатанок тевентень, весемесь лиси.