Чадыковонь 11-це чистэ 15 чассто «Надежда» приютонть юрсо (Сущинскоень куро, 10) Семиянь МФЦ-нть ютавтови «День службы занятости в МФЦ». Карми важодеме консультациянь пункт, истя жо ютавтови «Я настоящая» авань клубонь промксось.
Чадыковонь 12-це чистэ 10-12 часто Креативной индустриятнень виевгавтомань куншкакуросонть (Саранскоень приборостроительнлй заводось, Васенконь курось) невтевить 3 площадкат.
Важодемань таркатнень максомань ярмункань секторсонть промышленностень, строительствань, велень хозяйствань ды лия енксонь 60 седе ламо производственной покш компаниятне невтить 2000 седе ламо чаво важодемань таркат.
«Вешницятнень туртов пек паро возможность теевемс содавиксэкс вакансиятнень марто, кортамс республикань сехте вадря важодемань таркатнень максыцятнень марто. Минь истя жо ютавтано профориентациянь тестирования, кочкатано вакансият, конат ладить иетнень ды образованиянть коряс, максстано консультацият трудонь законодательствань ды эрицятнень занятостень коряс законодательствань кевкстематнень коряс, тонавтано видестэ сермадомс резюме, евтнемс виев енкстнэде ды вадрясто ютамс стака собеседованиятнень», – евтнесь МР-нь Эрицятнень занятостень куншкакуронь прявтось Игорь Юрченков.
«Мой выбор» профориентациянь площадкасонть пурнавозетнень туртов ютавтыть мастер-класст эрявикс важодемань специальносттнень коряс, абитуриенттнэнь туртов ютавтыть образованиянь организациятнень презентацият, лездыть кочкамс тонавтнемань туртов енкстнэнь.
Теде башка, вешницятнень учи Приборостроительной заводов промтурось, тосо сынст туртов ютавтыть экскурсия.
Ярмункань федеральной пельксэнть арсеви ютавтомс аштемковонь 28-це чистэ.