Октябрянь 2-це чистэ Мордовиянь Прявтось Владимир Волков Московсо ютавтсь зярыя прявт вастовомат Президентэнть Администрациясо ды РФ-нь Правительствасо. Россиянь Президентэнь лездыцянть, РФ-нь Государственной советэнь секретаренть Игорь Левитин марто Владимир Волков кортась 2018 иень Футболонь коряс масторлангонь чемпионатонь Саранскойсэ ютавтовиця матчтненень анокстамодонть. Мордовиясо аволь умок улемстэ Игорь Левитин ваннынзе мундиалень прявт объекттнэнь - "Мордовия Арена" стадиононть ды аэропортонь комплексэнть, теде мейле макссь вадря питне важодематнень молемантень. "Саранскоенть чемпионатонтень анокстамонь вадрячись ды шкась а кармавты талномс. Строямонь темпатне вадрят, весемесь ули анок шкастонзо", - тешкстызе Игорь Левитин.
Московсо РФ-нь Президентэнь Лездыцянть ды Мордовиянь Прявтонть вастовомсто чемпионатонтень инфраструктурань объекттнэнь анокстамонь аравтлувось кортавсь седе домкасто, башка мель явозель мундиалень транспортонь пельксэнтень.
Теке жо чистэнть РФ-нь Правительствань Кудосонть ютавтовсь Владимир Волковонь ды Виталий Мутконь вастовомась. Россиянь Правительствань Председателень полавтыцянть марто кортавсть 2018 иень Футболонь коряс масторлангонь чемпионатонтень анокстамонь прявт кевкстематне, истя жо Мордовиясо физкультуранть ды спортонть седе тов виевгавтомась.
Мордовия Республикань Прявтонть пресс-службась