Артём Здунов тешкстызе электросетевой комплексэнь виевгавтомань эрявиксчинть, истя жо региононь промышленной потенциалонть мельсэ кирдезь. «Миненек эряви тешкстамс 2025-2029 иетнес электросетевой объекттнэнь витнемань ды од строямонь покшолматнень, кирдемс мельсэ Мордовиясо теевиця экономикань башка зонань вешематнень», – мерсь республикань Прявтось.
Маласо вете иетнес «Россети Волгань» филиалонь «Мордовэнергонь» капитальной путовкстнэнь финансированиясь учови 2,7 млрд целковойть. Инвестициянь программанть лувсо арсеви панжомс 17,8 МВА трансформаторонь вийть ды электропередачань линиятнень 350 вайгельбетнеде седе ламо.
Энергетиктне башка мель явить Мордовиянь потребительтненень электроснабжениянь нардевчинь кастомантень ды электросетевой хозяйствань инновациянь виевгавтомантень. Арсеви витнемс распределительной сетть республикань Отяжбуень, Орданьбуень, Ицялонь, Дубенкань енкстнэсэ.
Электрической сеттнень нардевчист ды лезэвчист кастоманть туртов арсеви аламо-аламо нолдамс тевс автоматизациянь ды энергообъекттнэнь управлениянь распределенной интеллектуальной система, путомс микропроцессорной терминалт ды телеуправлениянь системат.
Вастовомасонть истя жо кортасть республиканть ды электросетевой компаниянть ютксо вейсладямодонть. Сонзэ тешкстамонть пингстэ Мордовиянь электрической сеттнес инвестициятне покшолгавтовить эште 632 млн целковойтнес.
Вастовомасонть истя жо кортасть Мордовия Республикасо кабелень продукциянь теицятнень марто седе тов важодемадонть ды электрической сеттнень консолидациянь кевкстематнеде.
«Республикань экономикась касы, ды минек вейсэнь тевдеемась лезды икельдязь лувсо виевгавтомс сонзэ инфраструктурань юронть», – тешкстызе «Россети Волга» компаниянь генеральной прявтось Александр Гаврилов.
Мордовия Республикань Прявтонь Пресс-службась