«Социальной фондонь отделениясь – Мордовиясо федеральной покш структуратнень ютксо вейкесь. Те эсь важодеманть коряс сехте покш организация – сон, яви эрицятненень 44 государственной услугат, ламотнень мереви получамс электронной лувсо эли МФЦ-нть вельде», – пурнавозетненень пшкадемстэ тешкстызе республикань руководителесь.
Артём Здунов евтась сюкпря Россиянь Социальной фондонь руководителентень ероков куватьс иетнень туртов условиятнень теемасо республикантень лездамонть кисэ. Республикань 17 райононэсэ уш важодить Сыре ломантнень вастовомань-кортамонь куншкакурот, сы шкасто панжовить весе районтнэсэ. Вадря валт евтыть сиянь иень ломантне ды сынст эйкакштне.
«Россиянь Социальной фондонь Мордовиянь отделениясонть важодить покш квалифицированной, превей специалистт, сынь топавтыть тевест неень шкань весе технологиятнень коряс. Сынст ютксто пеледест ламотне профессиясонть 10 седе ламо иеть. Минь ламо кортатано династиятнеде. Ули покш мель: те профессиясонть, конась веши цидярдома, ломантненень мелень явома, психологиянь содамо, истя жо улест кемевикс династият», – мерсь Артём Здунов.
«Социальной фондонть ды Мордовия Республиканть сюлмить деловойть, вадрят отношениятне. Минь карматано тееме весементь эсенек пельде, топавтомо арсезь весе проекттнэнь, штобу республикань эрицятне марявольть минек мелень явоманть, – мерсь Сергей Чирков ды пшкадсь фондонь сотрудниктненень. – Евтан седейшкавань поздоровт покш казнетнень кувалма, конатне тыненк течи явшезь. Арсян тенк ансяк паро эрямо, изнявкст седе тов важодемасонть!»
Церемониянть лувсо истя жо тешкставсь вейсладямо Мордовия Республиканть ды Россиянь Федерациянь Пенсионной ды социальной фондонть ютксо. Сон аравтозь эрицятнень башка категориятненень государственной гарантиятнень, социальной лезксэнь тевтнень, социальной услугатнень ды социальной енкссо государственной политикань топавтомань лия кевкстематнень явомань коряс вейсэнь тевдеемантень. Документэнть алов кедьчелькест путызь Артём Здунов ды Сергей Чирков.
Мордовия Республикань Прявтонь пресс-службась