Апрелень 24-це чистэ Владимир Волков ютавтсь промкс Саранскойсэ аэропортонь комплексэнть педе-пев витнемань кевкстематнень коряс. Республикань Прявтонь тевтнень нурька шкас топавтыцясь ваннызе пассажирэнь терминалонь од зданиянь строямонть, кортась компаниянь-подрядчикень прявтонть марто топавтовиця тевтнеде ды путсь прявт тевть строямонь вийтнень покшолгавтомаст коряс.
«Аэропортонь комплекссэнть пасажирэнь терминалонь теемась - прявт тевтнестэ вейкесь, конатнень путынзе масторонь руководствась республиканть икелев 2018 иень Футболонь коряс мирэнь чемпионатонтень анокстамонть лувсо. Максомс объектэнть шкастонзо - 2017 иень октябрянь 1-це чинтень - прявт тев весенень, строителенть эйстэ саезь прявтонть самс. Ответственность канды эрьвась!» - ледстизе промкссонтень пурнавозетненень Владимир Волков.
МР-нь строительствань ды архитектурань министранть Виктор Цыгановонь ды подрядной организациянь прявттнэнь пассажирэнь терминалонь од зданиянть теемань коряс важодеманть топавтомадо пачтямотнень кунсоламадост мейле, Республикань Прявтонь тевтнень нурька шкас топавтыцясь кармавтсь совавтомс полавтомат объектсэнть важодемань топавтомань графикентень. Фасадонть ды латонть строямонь прявт тевтнень марто вейсэ эряви ушодомс лия тевтнененьгак, конатнень топавтомс эряви ламо шка. Кортамось мольсь инженерэнь сеттнень теемадост, истя связень линиятнень ветямодост, вокзалонь площаденть вадрялгавтомадонзо.
Теде башка, кармавтозь ламолгавтомс объектсэнть важодицятнень 400 ломаньс ды топавтомс строямонь-монтажонь тевтнень кавто сменасо. Мордовиянь Минстроентень объектэнь заказонь теицянть, республикань ГОСУКСонть марто вейсэ, кармавтозь маень 2-це чинть видьс совавтомс полавтомат календарень весе плантнэс-графиктнес, истя жо - строямонь площадкантень эрявикс материалтнэнь ды техниканть пачтямонтень.
Владимир Волков кармавтсь пассажирэнь од терминалонь строямонь коряс весе кевкстематнень кирдемс башка ванновт ало МР-нь Правительствань Председателентень Владимир Сушковнень. Теде башка, региононь прявтонь тевтнень нурька шкас топавтыцясь тешкстызе, од подрядчикенть самонзо марто объектсэнть важодематне кармасть молеме од лувсо, ды вадря ёнов те полавтоманть редизе Россиянь Правительствань Председателень полавтыцясь Виталий Мутко, конась аволь умок сакшнось минек республикав.
Мордовия Республикань Прявтонть пресс-службась