Владимир Волков кортась Россиянь строительтнень Ассоциациянь президентэнть марто Саранскойсэ аквапарконть строямодо

Овторникстэ, мартонь 21-це чистэ, Мордовиянь Прявтось Владимир Волков вастовкшнось Россиянь строительтнень Ассоциациянь Президентэнть Николай Кошман марто, кортасть строямонь ды производствань сферасо вейсэнь важодемадонть. Чинь повесткань кевкстематнестэ вейкекс кармась Саранскойсэ аквапарконь строямонь коряс вейсэнь важодемась.

Николай Кошман ёвтынзе Республикань Прявтонтень Саранскойсэ неезенть коряс мелензэ: «Ошось пек вадрясто виевгавды, ванькс, мазый. ЧМ-2018 объекттнэнь строямонь площадкатнесэ важодемась лаказь лаки - стадионсонть, маласонзо эрямонь районсонть, ды арсян, те карми Саранскоень сехте мазый тарка!»

Инжетне истя жо ванкшнызь Мордовиянь предприятиятнень производствань площадтнень, конат совить оптиволоконной кластерэнтень - «Оптиковолоконные системы» АО- сь ды  «Оптикэнерго» ГК-сь, конатнень максозь питне кода «21 пингень заводт, конатне технологиятнень ды производствань ладямонть коряс кеместэ икельдить аволь ансяк Россиянь, истя жо омбо масторонь коллегатнень».

Вейсэнь важодемань вейке ёнкссокс, конась ванкшнозель вастовомасонть, кармась Россиянь строительтнень Ассоциациянть лезксэнзэ вельде Саранскойсэ аквапарконь строямось. Николай Кошман тешкстызе курокчинть, конань марто региононь ды ошонь властне ванкшныть весе кевкстематнень, конат токшить те проектэнть топавтоманть. Уш кочказь аквапарконь стряомонь таркась (Волгоградская ульцясонть аштиця «Сити-Парк» ТЦ-нть малас), истя жо ванкшнозь проектированиянь ды модань тевень ладямонь кевкстематне. Пурнавозетне састь вемельс, строямс аквапарконть самай тезэнь, Футболонь коряс Мирэнь Чемпионатонь прявт объекттнэнь, микшнемань-оймсемань покш центранть малас.

Владимир Волков тешкстызе: «Те объектэсь вадрясто карми ладямо од микрорайононь архитектурантень ды карми эрявикс аволь ансяк Саранскоень ды Мордовиянь эрицятненень, истя жо тей кармить сакшномо ламо туристт. Аквапарконь строямось - прявт тев, конань эряви топавтомс!»

Проектэнть топавтомань весе кевкстематнень Мордовиянь Прявтось кармавтынзе кирдемс башка ванновт ало республикань Правительствань Председателень полавтыцятненень, конат ванныть инфраструктурань виевгавтомань ды строямонь кевкстематнень, истя жо Саранск ошонь округонь прявтонтень Петр Тултаевнень.

Мордовия Республикань Прявтонть пресс-службась