Февралень 21-це чистэ Мордовиянь Прявтось Владимир Волков примась участия торжественной мероприятиясонть, конась алтазель республикасонть Иневанькс праведной Ушаков воинэнь Иенть панжомантень, сон ютавтовсь И.М.Яушевень лемсэ музыкань государственной театрасонть.
«Минь покш каштанчи марто лемдтяно Россиянь флотонь легендарной адмиралонть эсенек ёнксонь ломанекс. Фёдор Ушаковонь тевензэ ламо пингень перть лездыть кастомс од ломантнень, Отечествань весе ванстыцятнень патриотизмань лувсо, - мерсь МР-нь Прявтось. - Эште эрямонзо пингстэ адмиралонтень ломантне явсть башка вечкема ды мель».
40 ламо тюрематнесэ Ушаковонь вестькак эзизь изнякшно. Сонзэ прявтонзо ало апак емавто вейкеяк корабля, вейкеяк матрос эзь понго полонс яттнэнень. Васенце казненть Фёдор Фёдоровичнень максызь чуманть каршо бороцямонть ды матростнэнь кисэ мелявтоманть кисэ.
«Адмиралось кармась рузонь моряктнень смелчинь ды а пелемань, Россиянь флотонь виевчинть, видечинть невтемань тешксэкс. Весе сонзэ эрямозо тонавты минек вейкентень -кодамо стака илязо уле, свал кадовомс ломанекс, улемс верноекс Тиринь масторонтень ды присягантень», - тешкстызе Владимир Волков.
Аволь стяко, Ушаковонь орденэсь, конась кемекстазь Ине Отечественной войнанть шкасто, кармась моряктнень воинской отличиянь сехте почетонь знактнестэ вейкекс. Сон максозь малав 200 ломантненень, сынст ютксо англань ды американь флотонь офицертнэ.
Мордовиянь эрицятнень туртов Фёдор Фёдорович малавикс. Самай тесэ сон эрясь меельце иетнестэ. Эсензэ ярмаконзо лангс панжсь Темниковасо госпиталь, ламосо лездась 1812 иень Отечественной войнанть шкасто. Ушаков кармавтсь калмамс сонзэ Санаксарс, Мордовиянь модас.
«Нама, Мордовиянь эрицятненень свалшкань ледстнемакс кадовить покш кенряксчитне, конат сюлмавозь Фёдор Ушаков адмиралонть канонизациянть марто. Ютазь иестэ топодсть 15 иеть историянь те покш тевентень. 2001 иень авгуссто Темников ошось кармась православиянь весе мирэнть духовной куншкакурокс. Канонизациянть ветизе Московонь ды Весе Русень неень шкань Патриархось Кирилл. Кенярксчинтень пурнавкшность 7 тёжадо ламо ломанть. Ломантне сынсь, седеень вешемаст коряс, састь масторонь весе ёнксстнэстэ, - ёвтнесь МР-нь Прявтось. - Оймень виень кепедемась лездась тенек топавтомс эштё вейке покш тев - строямс Саранскойсэ Фёдор Ушаковонь лемсэ Кафедральной Собор. Минь стявтынек сонзэ весень вийсэ, лездасть тёжат эрицятне, ламот предприятиятне ды бизнесментнэ».
Владимир Волковонь валонзо коряс, Темниковасо арсеви путомс Фёдор Ушаковонь памятник, панжомс сонзэ лемсэ музейсэнть од залт ды экспозицият, косо пурназь питней экспонатт, лия енов а молиця сюпавчить. «Республикань Правительствась анокстась мероприятиянь аравтлув, конась алтазь Ушаков адмиралонть ледстнематнень 200 иетнень топодемантень. Малав весе сынь ютавтовить октябрясто. Ветявить весероссиянь научно-практической конференцият, истя жо Севастополь ошсонть, тосо прими участия Черноморской флотонь прявт командованиясь. Севастополев пачтяви адмиралонть мощатнень пелькскесь, Херсонессэ ветяви крестной ютамо», - мерсь Мордовиянь Прявтось. Иень перть ютавтовить выставкат ды презентацият. Мероприятиятнесэ истя жо примить участия эйкакшт ды од ломанть.
2018 иень футболонь коряс мирэнь чемпионатонтень нолдави ледстнемань ярмак, косо карми невтезь республикань прявтошонть мазый таркась - Феодор Ушаковонь лемсэ Кафедральной соборось.
Республикань Прявтось ёвтась сюкпрянь валт «Звезда» телеканалонь прявтнэнень ды весе важодицятненень, кить примасть участия адмиралонтень алтазь фильманть анокстамосо, истя жо Андрей Мерзликин актёронтень.
Шумбракстнемань вал марто залонтень пурнавозетнень пшкадсть Саранскоень ды Мордовиянь митрополитэсь Зиновий, РФ-нь Вооруженной Вийтнень «Звезда» Телерадиокомпаниянь маркетингень коряс генеральной директоронть полавтыцясь Алёна Сластенина, Россиянь Вооруженной Вийтнень генеральной Штабонь Академиянь военной историянь НИИ-нь старшей научной сотрудникесь Владимир Овчинников, «Звезда» телеканалонь «Военная приемка. След в истории» проектэнь генеральной продюсерэсь Оксана Матвеева, Звезда» телеканалонь «Военная приемка» проектэнь ветицясь ды руководителесь Алексей Егоров.
Кенярксчинь мероприятиясонть невтезель «Ушаков - адмирал Божьей милостью» фильмась.