Январень 17-це чистэ Мордовиянь Прявтось Владимир Волков примась участия Саранскоень духовной семинариянь Попечительской советсэнть, конась Саранскоень ды Мордовиянь митрополитэнть Зиновиень прявтсо ютавтовсь Республикань Кудосонть. Кортамось мольсь Саранскоень православиянь духовной училищанть, конась Мордовиясо важоди 1997 иестэнть саезь, духовной семинариякс теемадонзо.
Владимир Волков пшкадсь Попечительской советэнь члентнэнень - бизнес-сообществань представительтненень, республикань вузонь, промышленной покш предприятиянь прявттнэнень, истя жо промкссонтень тердезь Мордовиянь исполнительной властень органтнэнь ды муниципальной образованиятнень важодицятненень, Госсобраниянь депутаттнэнень. Республикань Прявтось тешкстызе Мордовиясо духовной образованиянть виевгавтоманть эрявиксчинть ды сы шкань пастырьтнень анокстамонть туртов вейсэнь вийтнень путоманть.
«Светской ды духовной властенть прявт тевезэ - пештемс сы шкань семинариянть потмонь лувсо, конась карми алкуксонь ветицякс христианонь паронь теицятнень эрямос. Кеман, покш квалификациянь кадратне, конат анокставить Саранскоень духовной семинариясонть, кармить эрявикст аволь ансяк Мордовиясо, истя жо сонзэ томбалеяк», - тешкстызе Владимир Волков.
Заседаниясонть истя жо теезь Саранскоень духовной семинариянь научно-методической лувонть виевгавтомань ды кемекстамонь коряс Попечительской советэнь комиссия. Попечительской советэнь Почетонь председателекс кочказь Зиновий Владыкась, председателекс - «Талина» агрохолдингень президентэсь Виктор Бирюков.