Цетвергстэ, июнень 12-це чистэ, ютавтовсь Мордовиянь Прявтонть Владимир Волковонь РМ Рейл компаниянь Генеральной прявтонть Павел Овчинников марто важодемань вастовомась. Кортавсть васенце пель иестэнть важодемань невтевкстнэ, истя жо од проекттнэнь топавтомась.
Павел Овчинников ёвтнесь региононь прявтонтень, васенце пель иестэнть РМ Рейлсэ вагонтнэнь нолдамонь покшолматне икельдизь 3500 единицань невтевксэнть, 2017 иестэнть весемезэ нолдазельть ансяк 4232. Истя жо меельце ниле иетнень перть РМ Рейлсэ 2,5-ксть кассь валомань производствась. 2018 иентень арсеви нолдамс 7000 ламо покш вагононь валомань вагононь комплекст, поладови важодемась автопроизводительтнень марто.
«Вагононь» прявт проектэкс кадовить полувагонтнэнь, метанолонь, постной оень, нефтехимической сталмотнень, удобрениятнень, соляной кислотань усксемаст туртов цистернатнень, хоппертнэнь-цементэнь усксематнень ды сюронь усксематнень нолдамось. Анок од, покш технологиянь 80-футонь платформань варчамонь образецэсь. Неть контрактнэнь топавтомаст туртов РМ Рейл компаниясь ютавты рекрутингень покш компания – панжозь важодемань од специальностнень пурнамось, тевс нолдазь тонавтомань программат. Компаниянь социальной программанть республикань Прявтось тешкстызе башка, ёвтызе, зарплатань коряс кирдематнень а улемась, сонзэ кастомась ды предприятяисонть важодемань таркатнень ламолгавтомась истя жо эрявикст, кода предприятиянь производствань физической покшолматне ды финансонь невтевкстнэ.
Важодемань вастовоманть шкасто истя жо ваннозь контракттнэнь топавтомань ды экспортонть виевгавтомань кевкстематне. 2018 иестэ продукциянь пельксэсь, конась нолдави предприятиясонть омбо масторонь рынкатнень туртов, карми вейсэнь покшолмасонть нилеце пелькстэнть седе ламо.
Кевкстематнень кортамосо ульнесть республикань Правительствань Председателень васенце полавтыцясь – экономикань, торговлянь ды предпринимательствань министрась Владимир Мазов, Правительствань Председателень полавтыцясь – промышленностень, наукань ды од технологиятнень министрась Александр Седов.
Тешкстасынек, вастовомась ютавтовсь Металлургонь чинть каршо, конась тедеде вейсэндяви РМ-Рейлэнь литейной заводонь ВКМ-Сталень 50 иетнень марто. Владимир Волков ёвтась седейшкавань поздоровт предприятиянь коллективентень профессиянь кенярксчинть кувалма, арсесь саемс важодемасо покш изнявкст.
Мордовия Республикань Прявтонть пресс-службась