Маень 24-це чистэ Саранскойсэ ютась Технопарконь Научно-технической советэнь промксось. Сонзэ участникекс ульнесть Российской Федерациянь Президентэнть региононь экономикань интеграциянь кевкстематнень коряс советникесь Сергей Глазьев, истя жо Россиянь содавикс ученойтне ды РАН-нь академиктне.
Важодемань программанть лувсо Мордовиянь Прявтонь тевтнень нурька шкас топавтыцясь Владимир Волков ёвтнесь Советэнь участниктненень 2018 иень масторлангонь футболонь чемпионатонтень Саранскоенть анокстамодонзо. Инжетне ваннызь строявиця стадиононть маласо эрямо кудонь од комплексэнть. Весе объекттнэсэ ней ветявить строямонь тевтне. «Чемпионаттонть мейле тесэ кармить эрямо малав 35 тёжат ломанть. Вейке эйдень кужось уш панжозь, строятано эштё кавто, ушодовсь микшнемань покш центрань ды поликлиникань строямось. Покш каштанчи марятано «Тавла» образованиянь центранть коряс, тосо кармить тонавтнеме 1,5 тёжат эйкакшт, учоматнень коряс, сон карми сы шкань школань невтемакс. Кода Ёроков эйкакштнень туртов лицейсэнть, тесэ кармить нолдазь тевс неень шкань тонавтомань од методикатне ды технологиятне, – тешкстызе Владимир Волков. – Целанек Саранскоесь аноксты 2018 иень футболонь коряс масторлангонь чемпионатонтень графикень коряс. Те иенть прядовомс весе объекттнэ кармить нолдазь тевс».
Президентэнь советникенть ульнесь покш мелезэ содамс седе, кода республикантень удалакшны строямс ламо эрямо кудот. Мордовиянь Прявтось пачтясь, 2016 иестэ строямонь покшолмась аволь ансяк эзь алкиньгадо, мик кассь. Тенень пек лездась республикань льготной ипотекань программась – иезэнзэ вете процентт. Те лездамс ванстомс строямонь покшолматнень ды тердемс отраслянтень башка инвестицият.
Сергей Глазьев тешкстызе уш топавтозь тевтнень покшолманть ды ёвтась кемема, Саранскоесь вадрясто ютавтсы чемпионатонь матчтнень.
Мордовия Республикань Прявтонть пресс-службась