Маень 24-це чистэ Саранскойсэ ютавтовсть Технопарконь Научно-технической советэнь промксонть лувсо зярыя мероприятият. Промкссонть важодемасо ульнесь Россиянь Федерациянь Президентэнь региональной экономикань интеграциянь кевкстематнень коряс советникесь Сергей Глазьев, истя жо Россиянь содавикс учёнойтне, РАН-нь академиктне: Технопарконь Научно-технической советэнь председателесь, «Всероссийский научно-исследовательский институт авиационных материалов» ФГУП-нь генеральной прявтось, РФ-нь государственной научной центратнень Ассоциациянь президентэсь Евгений Каблов, «Санкт-Петербурский национальный исследовательский университет информационных технологий, механики и оптики» ВО-нь ФГАОУ-нь ректорось Владимир Васильев, «Научно-исследовательский институт молекулярной электроники» АО-нь генеральной прявтось, «РТИ Микроэлектроника» ЗАО-нь генеральной прявтось, «Микрон» ПАО-нь прявттнэнь советэнь председателесь, генеральной конструкторось Геннадий Красников, «Российский фонд фундаментальных исследований» ФГБУ-нь советэнь председателесь Владислав Панченко.
Мордовия Республикань Прявтонь тевтнень нурька шкас топавтыцясь Владимир Волков Сергей Глазьевень ды Научно-технической советэнь участниктнень васняяк содавтынзе республикань инновациянь научно-производственной кластерэнть марто ды, истя жо сень марто, кода Мордовиясо тевс нолдави «школась — вузось — технопаркось» тонавтомань-производствань сюлмось.
Васенцекс НТС-нь участниктнень важодемань программасонть кармась Ёроков эйкакштнень туртов лицеень содавтомась. Тесэ ваннызь тонавтнема лабораториятнень важодемаст, кортасть тонавтыцятнень ды тонавтницятнень, раськеютконь олимпиадатнесэ изницятнень ды призёртнэнь марто.
Владимир Волков тешкстызе: «Ёроков эйкакштнень марто важодемась республикасонть ветяви системань лувонть коряс. Республиканть туртов лицеесь кармась инновациянь плошадкакс, косо тонавтнемасонть тевс нолдавить неень шкань сехте од ды вадря методикатне, конат лездыть ютамс шканть марто вейке эскелькссэ, анокстамс специалистт неень шкань экономикань отраслятнень туртов».
Тонавтнемань те учреждениянть невтевксэнзэ — покш каштанчи. Кавто иень перть лицеесь ульнесь омбоцекс «500 лучших школ России» рейтингсэнть.
Седе тов Технопарконь Научно-технической советэнь участниктне содавтызь Мордовиянь государственной университетэнть, ульнесть Математикань ды информационной технологиятнень факультетсэнть ды Физикань ды химиянь институтсонть. Башка мель инжетне явсть волоконной оптикань лабораториянь важодемантень. Те ёнксось ашти прявтокс республиканть туртов, Мордовиясь те отраслянть коряс масторсонть васенце. 2015 иестэнть саезь Саранскойсэ важоди оптической волокнань промышленной производстванть коряс Россиянть келес вейкине завод. Кода тешкстызе Владимир Волков, те лия ёнов а молиця производствасонть течинь чине роботыть Мордовиянь госуниверситетэнь прядыцятне, истя жо Физикань ды химиянь институтонь выпускниктне. Волоконной оптикань лабораториясь панжозель 2012 иестэнть, теке марто роботась те ёнкссонть ветяви уш зярыя иеть, институтось кирди кеме сюлмот РАН-нь Волоконной оптикань научной куншкакуронть марто.
Оптической волокнань нолдамонь коряс заводось кармась содавтомань эштё вейке таркакс. Предприятиянь генеральной прявтось Андрей Николаев инжетнень туртов ветясь экскурсия ды ёвтнесь важодемань прявт ёнкстнэде.
Предприятиянь продукциясь ютызе тестированиянь программанть ды сонензэ максовсь соответствиянь сертификат. Течи Мордовиянь оптической волокнась пачтяви Китаев ды Евросоюзонь мастортнэс.
Маласо шкастонть арсеви пусковой омбоце комплексэнть строямозо. Сонзэ вельде решави технологической независимостень ды производстванть туртов весе эрявикс сырьянь анокстамонь кевкстемась. Эксперттнэнь ванновтост коряс, 2012-2016 иетнестэ отечественной рынкань средней покшолмась – 5 млн километрат оптической волокна иезэнзэ.
Технопаркссонть Советэнь участниктне ваннызь инновациянь проекттнэнь выставканть. Истя жо тесэ эсь анокставкстнэнь невтинзе Мордовия Республикань Нанотехнологиятнень ды наноматериалтнэнь куншкакурось. Покш мельсэ пурнавозтне ваннызь кремниень карбидэнь теемань коряс проектэнть, конась канды стратегической смусть силовой электрониканть ды радиоэлектрониканть касомасо-кепетемасо. Мордовиясо сонзэ топавтоманть туртов теезь научно-производственной цела сюлмо, козо совить университетэсь, «Электровыпрямитель» заводось ды республикань Технопаркось. Кода ёвтнесь Владимир Волков, неень шкане республикасонть ладязь кремниень карбидэнь опытно-промышленной нолдамось, путозь задача лисемс те материалонть промышленной производствантень.
Истя жо покш инжетне содавтызь Эйкакшонь технопарконть — научно-технической ёнксонть коряс дополнительной образованиянь од площадканть. Ледстясынек, ютазь иестэнть Мордовиясь совась масторонь 17 регионтнэнь юткс, конатненень явовсть ярмакт Эйкакшонь технопарктнэнь тееманть туртов. 56 миллионт целковойтне федеральной бюджетстэ ды 24 миллионт целковойтне республикань бюджетстэ лездасть рамамс лия ёнов а молиця оборудования ды теемс алкуксонь лабораторият зярыя ёнксонь коряс ванкшноматнень-тонавтнематнень туртов. Те лазерэнь технологиятне, биотехнологиятне, альтернативной энергетикась, роботостроениясь, компьютерной технологиятне.
Сергей Глазьев покш мельсэ ваннынзе эйкакштнень туртов лабораториятнень, эли кода тесэ эйсэст лемдить – квантумтнэнь. Весемезэ эйстэст сисем, теке марто, вейкесь – лиятнень ёнов а молиця: «Лазерные технологии» лабораториясь арась масторонь вейкеяк лия Эйкакшонь технопарксонть. Россиянь Минобразованиясь кирдизе республиканть бажамонзо истямо специализациянть тееманть сень коряс, республикасонть кастови-виевгавтови волоконной оптикась ды оптоэлектроникась. Ды оптической волокнань нолдамонь коряс масторонть келес вейкине заводось важоди Мордовиясо.
«Эйкакштнень дополнительной тонавтомнаь туртов те площадканть важодемазо аравтови покш кевкстемань витемантень: республикань промышленностень неень шкань отраслятнень туртов инженерно-технической кадратнень анокстамонтень. Тесэ тонавтнемась лезды эйкакштненень анокстамс сы шкань профессиянтень, саемс изнявкст те эрямосонть», – тешкстызе Владимир Волков.
Мордовия Республикань Прявтонть пресс-службась