Середатсо, июлень 5-це чистэ, Мордовия Республикань Прявтонь тевтнень нурька шкас топавтыцясь Владимир Волков ульнесь селекторонь промкссонть, конань ютавтызе Россиянь Федерациянь Правительствань Председателесь Дмитрий Медведев «Реформа контрольной и надзорной деятельности» программанть топавтомань кевкстеманть коряс.
Промксонь участниктненень пшкадемстэ Дмитрий Медведев тешкстызе, контролень ды надзоронь тевтеемань реформась явозь башка программас, косо весе прявт тевтне ульнесть ёвтазь башка ды кемекстазь 2025 иенть видьс. Тень пингтсэ тешкстызе, куш-кодамо реформанть лезэвчизэ ашти регионтнэстэ сонзэ топавтоманть эйстэ, секскак неть кевкстематнень эряви кортамс коллегатнень марто таркатнесэ.
Васняяк премьер-министрась промксонтень пурнавозь колнтролень ведомствань прявттнэнь мелест явовтынзе сень лангс, 2018 иестэнть саезь, аравтлувонть коряс весе ванкшноматне кармить ютавтовомо рискень категориянть лангс нежедезь: «Арась смусть якамс ванкшнома марто тов, косо ломантнень эрямост ды шумбрачист туртов зыянонь кандомась аволь покш. Теде башка, контролень ведомствань тевтеемантень карми максовомо питне аволь ютавтозь ванкшноматнень ламочист, сёрмадозь штрафтнень ды конёвонь мазый отчёттнэнь коряс, безопасностень алкуксонь невтекстнэнь вадрялгавтомаст коряс».
Программань топавтомадонть кортамтсо промксонтень пурнавозетне прасть вемельс, прявтось, мезенть эряви топавтомс реформанть вельде, – те целанек полавтомс контролень лувонть. Одс ладямс сонзэ «муемс коламо ды чумондомс» лувстонть бизнесэнтень партнёронь ды «сервисэнь» отношениянь лувонтень. Полавтомс ванновтонть коламотнень профилактикантень ды ёмавкстнэнь а нолдамонтень.
Бизнесэнть ветямсто правань коламотнень профилактиканть коряс тевтнень таликадост кортась Владимир Волков, зярдо ванновсть селекторной промкссонть прядовомадонзо мейле сонзэ итогтне. «Контролень-надзоронь органтнэнень, предпринимателень структуратненень ды госвластень органтнэнень эряви важодемс вейсэ, максомс вейке-вейкененень эрявикс кулят, кемекстамс вейсэнь эрявикс решеният, конат арсезь-кемекстазь сехте пшти кевкстематнень коряс. Профилактикань важодемась свал макссь седе покш лезэ певтеме ванкшноматнень ды покш штрафтнень коряс, конатнень эйстэ предприятиятне лиясто а вельмить! Седе прявтось, надзоронь органтнэ свал ютавтовольть предпринимательтнень марто кортамот ютавтозь ванкшноматнень коряс».
Региононь руководителесь тешкстызе, ламот мельтне-арсематне, конатне течи ёвтазельть ды кортавсть, эрявикст аволь ансяк сеть регионтнэнень, конат ёвтызь мелест, истя жо Россиянь весе регионтнэнень ды истя жо Мордовиянть туртов. Владимир Волков тешкстынзе лишнойть, ламоксть вастневиця, ташто надзоронь вешематнень стакачинть: «Неть вешематне а путовить вейс минек предприятиятнень течинь технологической виевгавтомнать марто – сынст эряви полавтомс!»
Селекторонь промкссонть ульнесть федеральной контролень-надзоронь ведомствань, федеральной ды региональной министерствань ды ведомствань прявттнэ, предпринимателень ды общественной вейсэндявкстнэс совицятне.
Мордовия Республикань Прявтонть пресс-службась