Мордовия Республикань Прявтонь тевнень нурька шкас топавтыцясь Владимир Волков вастовкшнось Рузаевка ёнксонь прявтонть Вячеслав Кормилицын марто. Кортавсть социально-экономической виевгавтомань кевкстематне.
Владимир Волков тешкстызе, Рузаевканть виевгавтомась пек эрявикс республиканть туртов. Ламо ярмакт тедеде явовить китнень теемс ды ошонть вадрялгавтомс-мазылгавтомс. Неень шкане моли Некрасовонь ды Трудовой ульцятнесэ китнень строямось, ушодозь Станиславскоень ульцясо кинть витнемась. Истя жо кармить витнезь магистралень-транзитэнь кавто кить: Марксонь – Ленинэнь ды Маяковскоень – Луначарскоень – Калининэнь ульцятнева. Од кить теевить Левжа ды Татаронь Пишля велетнесэ. Весемезэ китнень строямс явови 90 млн целковойде ламо. Кудотнень маласо таркатнень мазылгавтомс-вадрялгавтомс максовить 11 млн целковойть. Карми витнезь ошонь паркось – неть тевтнес максовить 2,3 млн целковойть. Вячеслав Кормилицын пачтясь Владимир Волковнень, кизэнть прядовомс кинь строямонь прявт тевтне улить прядозь.
Истя жо кортавсть ошонь пелевеёнксонь районсонть 800 таркас од школань ды Левжа поселкасо 70 таркас эйдень кужонь строямонь кевкстематне – кавонест объекттнэнь эряви максомс те иенть прядовомс.
Вастовомасонть истя жо мольсь кортамо Рузаевкань районсо важодемань од таркатнень теемадост. Неень шкане анокстави панжомас «Рост-Рузаевка» мебелень фабрикась, нейтосо моли оборудованиянь путомась. Проектэнь вийтнес лисемстэ предприятиясонть кармить важодеме 300 ломанть. Маласо шкастонть ушодсы важодеманзо эштё вейке од предприятиясь – Рузаевкань локомотивень ремонтонь депось. Анокставить эштё зярыя проектт, конатнень вельде теевит важодемань од таркат.
Владимир Волков ледстизе, Государственной Собраниянтень Кучомасонть путозь задача кавто иень перть теемс Рузаевкасо тёжадо ламо важодемань од таркат. «Инвестортнэнь вешнемась, конат кармить анокт панжомс од произодстват, истя жо Рузаевкань енкссо, кадови прявт тевекс кода республикань, истя жо муниципальной властнень туртов», – тешкстызе республикань руководителесь.
Мордовия Республикань Прявтонть пресс-службась