Владимир Волков ютавтсь промкс республикань виевгавтомань прявт проекттнэнь коряс

Владимир Волков ютавтсь промкс республикань виевгавтомань прявт проекттнэнь коряс

Середасто, июлень 11-це чистэ, Владимир Волков ютавтсь покш промкс, косо ульнесть Мордовиянь Правительствань ды Прявтонь Администрациянь члентнэ. Кортавсть маласо ды сы шкантень региононь виевгавтомань стратегической прявт проекттнэ.

Мордовиянь Прявтось тешкстызе, прявт вийтнень эряви путомс национальной проекттнэнь топавтомантень, конатнень ёвтынзе Россиянь Президентэсь, сынь токшить масторонь научно-технической ды социально-экономической виевгавтоманть, эрицятнень ламолгавтоманть ды Россиянь ломантнень туртов эрямонь вадря условиятнень тееманть.

«Течи миненек эряви явомс мель сеть кевкстематненень, конат аштить прявтокс республиканть виевгавтоманть туртов, те – эрямо таркатнень ды китнень строямось, эрямонь вадря условиятнень теемась, ЖКХ-со тевтнень ладямось, каладозь кудосто одс ютамось, здравоохранениясо, образованиясо, культурасо ломантнень туртов прявт проекттнэнь топавтомась, важодемань од таркатнень теемась. Весе неть ёнкстнэнь коряс улить программат ды проектт, конатнень софинансированиясь моли федеральной бюджетстэ, ды эряви, республикась улезэ эрицятнень туртов лезэв весе программатнесэ ды проекттнэсэ!»

Кунсолозь республикань кабминэнь члентнэнь пачтямост виевгавтомань проекттнэнь топавтомань коряс аравтлувтнеде.

Килангонь хозяйствань сферасонть прявтокс ёвтазь – Саранск ошонть перька кинть прядомась, Строительной курованть чугункань кинть ды Инсар леенть трокс кинь строямонть ушодомась, истя жо Саранск ошонь агломерациянть «Сэтьме ды вадря кить» прявт проектэнтень совавтомась ды Саранскоень аэропортсто раськеютконь чартерэнь рейстнэнь теемась. Максозь эрямо таркань покшолматнень 1,5-ксть ламолгавтомадо тевенть, конань кармавтызе Президентэсь, МР-нь Строительствань ды архитекутрань министрась Виктор Цыганов максь мель топавтомс льготань кредитованиянь программанть вельде ды республикань эрицятнень ламочист мельс саезь, кинень эряви вадрялгавтомс эрямонь условияст – течис те 26 тёжат ломанть. Башка кортавсь «Од семия» эрямо таркань максомань программасонть республикань улемась. Прявтокс истя жо ёвтазь бытовой отходтнэнь марто важодемань неень шкань системань теемань ды коммунальной инфраструктурань вадрялгавтомань проекттнэ.

Велень хозяйстванть коряс важодемань прявт ёнкстнэ – ракшань кастомань ды переработкань комплекстнэнь седе тов виевгавтомась, Мордовиянь велень хозяйствань товаронь нолдыцятненень кредитэнь лезксэнь покшолматнень ванстомась.

Башка мель Владимир Волков явсь социальной сферань федеральной проекттнэсэ Мордовиянь ёроков участиянь эрявиксчинтень. Здравоохранениясо – те онкополиклиникань строямось, велень ФАПтнень ды больницятнень витнемась ды сынст туртов оборудованиянь рамамось, образованиясо – школатнень ды эйдень кужотнень строямось ды витнемась. Истя жо тешкстазь Футболонь коряс масторлангонь чемпионатонь наследиянть лезэвстэ тевс нолдамонь эрявиксчись, инфраструктуранть ды туризманть виевгавтомась.

Промкссонть истя жо кортавсть региононь бюджетэнть сбалансированиянь, 2019 иентень сонзэ кемекстамонь кевкстематне, Владимир Волков истя жо ледстизе пурнавозетненень республикань казнанть пештемстэ ды государствань ярмактнень ютавтомсто пандомань пшти дисциплинанть топавтомадо.

Мордовия Республикань Прявтонть пресс-службась