Мордовия Республикань Прявтонь тевтнень нурька шкас топавтыцясь Владимир Волков ютавтсь выездной оперативной промкс «Юбилейный» эрямонь комплексэнь строямонь кевкстематнень коряс. Промкссонть ульнесть Мордовиянь Правительствань Председателесь Владимир Сушков, Саранск ошонь округонь прявтось Петр Тултаев, профилень министерствань ды подрядной организациянь прявттнэ.
Неень шкане объекттнэсэ, конат стявтовить те районсонть, моли пек покш важодема – весементь эряви максомс те иенть прядовомс. Башка мель, кода тешкстызе те тарканть ванномсто Владимир Волков, эряви явомс Тавла леень чиренть вадрялгавтомантень-мазылгавтомантень – тесэ эряви важодемс седе куроксто.
«Юбилейный» эрямонь комплексэнь алкуксонь мазылгавтомакс кармась од школась, сон неяви ве ёндо. Владимир Волков, конась кирдсь строямонть башка ванновт ало, ваннызе тонавтнемань од заведениянть ды кадовсь мельспаросо. Школасонть кавто бассейнат – покш ды вишкине, спортонь кавто залт, хореографиянь зал, покш стадион, спортонь ламо площадкат.
Ней тонавтнемань заведениясь аноксты тонавтницятнень саемантень. Тевесь аволь стяконь – ансяк васенце класстнэде кармить кавксо. Тетятнень-аватнень промксстнэ, конат сюлмавозь тонавтнемань процессэнть ушодоманзо марто, молить эрязасто. Республикань руководителесь совакшнось вейкентень. Тетятне-аватне ёвтасть лембе валт образованиянь сферантень явозь меленть кисэ: од школась, сынст валост коряс, пек кенярдовты. Мордовиянь лидерэсь кемекстызе: «Тавла» тонавтомань куншкакурось (самай истямо лем максозь тонавтомань заведениянтень) кармазо сы шкань эталононь школакс. Школасонть путозь неень шкань учебно-методической оборудования, тесэ кармить нолдавомо темс тонавтомань сехте од ёнкстнэ, башка мель карми явовомо математикань профилентень.
Республикнаь руководителесь ваннызе школанть маласо тарканть вадрялгавтоманть-мазылгавтоманть. Тонавтнемань од иентень сонзэ тейсызь истямо жо мазыекс, кода сонсь зданиясь.
Владимир Волков ванкшнынзе эрямонь комплексэнь лия объекттнэньгак. Выездной промкссонть лувсо кемекстазь зярыя кармавтомат, конатнень вельде виевгавтовить строямонь тевтне.
Мордовия Республикань Прявтонть пресс-службась