Субутасто, таштамковонь 12-це чистэ, ютавтовсь Владимир Волковонь ды Россиянь Наукань академиянь (РАН-нь) Президентэнть Александр Сергеевень вастовомась.
РАН-нь руководителесь сась республикав васенцеде. «Минь сынек варчтамо тынк икеле молиця, покш технологиянь велень хозяйстванть. 2013 иестэ вейсэндявсть РАН-ось ды Россиянь велень хозяйствань наукань академиясь, минь кирдтянок ялгаксчинь сюлмот аграрийтнень марто. Ды, нама, ули меленек теевемс содавиксэкс тынк опытэнк марто, лия регионтнэнь туртов сон улезэ вадря невтемакс!»
Кортамось мольсь тонавтомань ды велень хозяйствань ёнкстнэнь коряс вейсэнь проекттнэнь топавтомадост. Александр Сергеев ёвтнесь «Агрокуб» проектэнть коряс, конань «Успех каждого ребенка» федеральной проектэнть лувсо РАН-сь вейсэ топавты РФ-нь Просвещениянь министерстванть марто. Пелькстамонь кочкамотнень коряс школатнес теевить «Агрокуб» лабораторият, косо кармить микробиологиянь, биотехнологиянь, селекциянь ды генетикань коряс неень шкань оборудования ды мебель. «Тосо ули весемесь сень туртов, покш классо тонавтницятне чарькодевельть неень шкань велень хозяйствань технологиятнесэ. Содавольть, неень шкань велень хозяйствась – пек мельстуиця ды покш технологиянь сфера, конанть эйстэ ашти вандынь чись!» – толковизе РАН-нь академикесь ды ёвтась мель невтемс те пелькстамосонть Мордовиянь школатнень. «Россиянь Наукань академиясь ней покш мель яви средней образованиянь системантень, эдь самай школасо путови се юрось, конась вети эйкакштнень покш наукантень», – толковизе Александр Сергеев.
Владимир Волков мерсь, республиканть ули мелезэ кирдемс кеме сюлмот РАН-нть марто, секс мекс Мордовиясь аволь васенце ие важоди «Школа-ВУЗ-Технопарк» рисьменть теемга. Тешкстазель, республикасонть тень туртов ули весе эрявиксэсь. Покш изнявкст, истя жо раськеютконь уровнясо, невтить Ёроков эйкашктнень туртов республикань лицеень тонавтництяне. Республикань руководствась кармавты ламолгавтомс тонавтнемань учреждениятнень, косо кармить важодеме ёроков эйкакштнень марто. Тень кувалма Владимир Волков макссь мель ламолгавтомс Мордовиянь школатнень, конатненень максови РАН-нь базовой школань статутось. «Мереви ванномс тень коряс «Тавла» тонавтнемань куншкакуронть, истя жо велень зярыя школатнень, конатнень юрсо кармить тонавтневеме неень шкань велень хозяйствань программатне ды технологиятне», – мерсь Мордовиянь Прявтось.
Вастовомасонть ульнесть Мордовия Республикань Правительствань Председателень Васенце полавтыцясь – Велень хозяйствань ды продовольствиянь министрась Владимир Сидоров ды Нижегородской областень Законодательной Собраниянь депутатось Николай Шкилев.
Мордовия Республикань Прявтонть пресс-службась