Ковылкинскяй ЦРБ-сь – республикаса фкя инь оцюсь, тяса ули нльне акушерскяй стационар, кона панчфоль 8 кизода инголе. Мордовиянь Оцюнясь ванозень условиятнень, конат тифт медучрежденияса, макссь питне оборудованиять улеманцты. «Здравоохранение» нацпроектть видеса ётай кизоть больницясь получась – компьютернай томографиянь аппарат, химлабораторияти мощнай микроскоп, ультразвуковой исследованиянди оборудования, реанимационнай отделенияти система. Тядде тяса ушедсть петемонза хирургическяй корпусть – работатне мольфтевихть нацпроектть мяльса кирдезь. Сембе петемань тефне и оборудованиять одкстоптомац Ковылкинскяй ЦРБ-са – тя оцюдонга-оцю одкстоптомать пяльксоц региононь шумбрашинь ванфтома системаса, конат шарфтфт Ковылкинскяй райононь и маластонь муниципальнай образованиянь эряйхненди медицинскяй лезксонь качествать касфтоманцты.
Шачфтомань отеделенияса Ковылкинскяй ЦРБ-нь базаса кемокстаф 12 васта. Кизоста тяса примаф 68 шачфтыда (42 - райнонь эряйхнень, 13 – лия ошень эряйхнень и тъняра жа республикань лия районцта). Тя лувкссь 62 % сяда ёмла 2019 кизоть коряс, эста отделенинь специалисттне примасть 182 шачфтыда. Отделенияса покодихть аф аньцек акушер-гинекологсь и акушеркатне, но и неонатолог врачсь. Мордовиянь Оцюнясь, корхнемок медицинскяй персоналть мархта, тяшкстазе: райононь эряйхне должны получандамс цебярь медицинскяй лезкс пяшксе объёмса. Тяконь мархта, сидеста сатомшка практикать аф улеманц инкса афсатыкс мархта и максф услугатнень качествасна. Эрявикс задачать – конань эряви ваномс – кода тиемс стане, штоба эряйхненди медицинскяй максомать улеманц мархта ванфтоволь и сонь оцю уровенец.
Стане жа тя шиня Артём Здунов ульсь Инсарскяй районнай больницяса, кона примси 10 тёжяньда сяда кржа ломань. Тя ащи сянь эзда, што 2020 кизоста пациенттнень лувкссна кирсь 15 %. А стационарса 38 васта ланкне ащесть «учемань» режимса. Тя сотф сянц мархта, што Инсарскяй райононь 60 % эряйхне получсихть цебярь медицинскяй лезкс аф районца.
Нинге тяшкстафоль, што аф ваномок амбулаторнай звенаса сатомшка кадрань уликсшить лангс, ётай кизонь итокнень коряс аф тифт плановай показательхне профилактическяй, диспансернай и урмань коряс пшкядемань ваноматнень коряс. Тя сотф узкяй специалисттнень аф улемаснон мархта.
Республикань Минздравонь рабочай группатнень и территориянь ФОМС-ть мархта ладяф ситуациять педа-пес ётафтф анализоц. Мяльхнень-арьсематнень ёткса – районнай ЦРБ-са узкяй специалистонь бригадать пуроптомац «вахтовай методса» - 10 шит районца эряма васта мархта, мезсь лезды ванфтомс медицинскяй лезксть максоманц уликсшинц и качестванц.
Коллектифнень мархта васедемста Мордовиянь Оцюнясь кулхцондозень сембе мяльхнень-арьсематнень – медикнень, райононь эряйхнень, шумбрашинь ванфтома сферань организаторхнень, муниципальнай образованиянь оцюнятнень.
Корхтамань итокнень ваномста, Артём Здунов тяшкстазе, што кепотьф тематне пяк эрявихть, кода пациенттненди, стане и медицинскяй персоналти, сяс сембе ванф решениятне кармайхть примафт сембе ширде. «Инголькиге эрь кодама решениянь примамста – кулхцондсаськ сембонь, сянкса тячи минь тясотама – марса здравоохранениянь министрть мархта!» - китькстазе региононь Оцюнясь. Эсь ширенц Артём Здунов азозе – медицинскяй лезкссь должен улемс вастова эрявикс объёмса – первичнай диагностикась и пчкафтомась, лабораторнай исследованиясь, диспансеризациясь, профилактикась.
Башка Оцюнясь азозень мялензон-арьсеманзон Ковылкинскяй ЦРБ-нь шачфтома отделениять колга: «Аватне, кда аш стакашит и башка ащи показаният саранскяень врачненди, Перинатальнай центрав пшкядеманди, эряви штоба улель возможность вановомс и шачфтомс шачема стенаса – тяса теест эряви мала ломаньцнон лезкссна».
Артём Здуновонь мяленц коряс, авань шумбрашити эряви шарфтомс башка ванф, тяконь лувксса, шумбрашинь ванфтома васенце звенаса – тяса ащи демографическяй няфтемась, кона пяк эряви регионтть касфтоманцты-виияманцты. Инсарскяй больницянь медперсоналть эняльксонц коряс маластонь пингть учрежденияв пачфтихть маммограф эрявикс профилактическяй работань ётафтомс.
Организационнай кизефкснень коряс районнай ЦРБ-са маластонь пингть ётай минздравонь коллегиянь пуромкс. «Корхтатама нинге весть специалисттнень мархта, тердьсайнек районнай докторхнень и приматама решения, кона ладяй сембонди. Экономическяй ширесь, шумбрашинь ванфтома учреждениятнень работаснон эффективностец, врачнень квалификацияснон ванфтомасна – эрявикст, но васенцекссь минь пичефтьсамазь ломаттнень прянь марямасна», - азозе Артём Здунов и сюконясь васедемань сембе участникненди седикс-ваймокс корхтаманкса.
Мордовия Республикань Оцюнять пресс-службац