2016 кизоть итогонзон коряс Мордовиясь сувась экономикать касондоманц коряс вете инь цебярь региоттнень лувксс . Валовай региональнай продуктась республикаса пачкодсь 209,6 миллиард цалковайс. 2015 кизоть коряс сон кассь 5,2 процентта.
Минэкономразвитият оценканц эзда сотцеви, што 2016 кизоня ламоц российскяй региоттнень ВРП-сна кассь аф ваномок странань экономикать 0,2 процентта праманц лангс.
Целайнек касомась приметаф 51 субъектса. Васенце вастть экономикать касондоманц коряс занязе Еврейскяй автономнай областсь (+7,1 процент). Мордовия Республикась, кемонь лидерхнень еткста ПФО-нь фкя и тяка регионць, занязе ветеце вастть.
«Аф ваномок стакатнень-сталмотнень лангс, 2016 кизоня тейнек удалась сатомс аф емла сатфкст. Экономикань сембе отраслятне аделазь кизоть касома мархта, ванфтфт ингольдень кизоть уровеньца инвестиционнай влажениятне. Работаньке водендафоль аф аньцек кризисть сяськоманкса, но и, васендакиге, экономикать и социальнай ширеть виияфнеманкса, - китькстазе Мордовия Республикань Оцюнять аф оцю пингс тевонзон тиендисна Владимир Волков. – 2017 кизоня и сяда товолдонь кизотнень арьсекшнетяма касфтомс валовай региональнай продуктать аф 5 процентта кржас. Эрь кизоня заработнай платать касомац должен улемс 1,5-крда сяда оцю средняйста странаса касоманц коряс, и кафтонь-крда сяда оцю инфляциять коряс. 10 процентта минимальнай и 5 процентта реальнай зарплатать касфтомасна – вов ся инь кржась, конань минь арьсекшнетяма пяшкодемс».
Ся региоттнень еткса, коса кирсь экономикась, Красноярскяй, Свердловскяй и Челябинскяй областтне. Сембодонга пяк экономикась кирсь Кировскяй областьса (- 1,5 процентта) и Пермскяй крайса (- 2,1 процентта).
Российскяй Федерациянь правительствать видеса Финансовай университетть исследованиянь результатонзон коряс маластонь кафта кофнень Мордовияса, ряцок Чувашиять мархта, учендови населениять доходонзон инь оцю касомасна. Тяфта лемдеви «нюрьхкяня» индекссь, кона няфнесы дохоттнень касомаснон перспективанзон, пачкодсь 4,8 процентс. Тя показательть коряс Мордовиясь странаса занязе колмоце вастть, явомок сонь Приморскяй крайть мархта.
Эксперттне отмечсесазь, што исследованиянь результаттнень мяльс сявондезь ули кода шарьхкодемс 2017 кизоня, а стане жа 2018-2019 кизотнень Россияса ВВП-ть аф ламода касоманц. Экономикать и граждаттнень благополучияснон касомац арьсемас коре поладови инь кржась 2018 кизоть самс.