19 июньцта Саранскяйса «Мордовия Арена» стадионца етась Колумбия-Япония 2018 кизонь FIFA-нь футболть коряс Миронь чемпионатонь матчсь. Васедемась аделавсь 1:2 счетса. Сяськсть Акира Нишинонь подопечнаенза. Матчта мельдень пресс-конференцияса прессать инголе выступандась Япониянь сборнайть главнай тренероц и нападающайсь Юя Осака.
«Ушедомста ни минь няфтеме кемеши, - отмечазе 63 кизоса японскяй специалистсь. – Ся, што минь командасонк ульсь фкя налхкида сяда лама, тусь тейнек пользас. Но тейнек эряви улемс сяда виикс аф лувксс, а налхкомас коре. Фкя пингть паксяса налхкомать вятезе Колумбиясь. Васенце таймась тейнек аф удалафоль.
Омбоце таймаса, мзярда паксять лангс лиссь Хамес, ульсь кода лисемс аф учентфти. Но марнек команданьке работась лац. Минь сяда лац кирдеськ мячть. Сяс тейнек и удалась сяськомс».
Башка Япониянь сборнайть тренероц отмечазень кафта налхкихнень – Инуи и Кагаву. «Синь пяк лац няевсть кода ськамост, стане и командаса», - мярьгсь Акира Нишино.
Кизефксть лангс, кода Япониянь сборнайсь праздновандасы тя сяськомать? Японскяй специалистсь китькстазе, што синь мзярс аш пингсна тиемс тянь. «Турнирсь аньцек ушедсь, и сяда товолдонь матчне стане жа арайхть тейнек оцю испытаниякс, - мярьгсь Нишино.
28 кизоса нападающайсь Юя Осака, кона выступандай немецкяй «Вердерть» инкса, лувфоль матчень инь цебярь налхкикс. Журналисттнень мархта корхнемста Юя азозе, што сувафтомс мячть воротатненди миронь чемпионатса сон арьсекшнесь ет шабакс.
«Тяни мон павазуван, - мярьгсь Осака. – Инголенк ащесь цель улемс отькорькс, улемс паксять лангса азоркс. Арьсян, тейнек сембось удалась. Сяда товга карматама старандама сатнемс цебярь результатт».
Колумбиянь сборнайть главнай тренероц Хосе Пекерман вов мезе азсь Япониять мархта налхкомать колга.
«Пцтай сембе матчть эздонк ульсь сяда кржа соперниконьконь коряс. Колумбияти удалась «лядомс шиса» васенце таймать пингста, сувафтомс мячть воротатненди. Омбоце таймать эса минь ашеме ту оборонас, тяряфнеме тиемс прябалат японскяй воротатнень инголе, но макссь эсь колганза содамс сиземаньке. Кода иток сяськсь японскяй командась. Мезе азолень Саранскяйть колга? Ошсь цебярь, пяк цебярь стадионць. Ужяль, што тейнек ашезь удала кандомс кенярдема болельщиконьконди, конат састь тяза. Вов тя аньцек колсесы тяса улеманьконь».
Азсаськ, што Японскяй сборнайть ширенц кирдема сась сонь Императорскяй Высочествац Япониянь Принцессась Хисако Такамадо.