Мордовиянь Оцюнясь Владимир Волков етафтсь рабочай васедема Ромодановскяй сахарнай заводть вятиенц Александр Атласовонь мархта. Корхтамась мольфтевсь предприятиять виияфнеманц, производственнай мощносттнень касфнемаснон колга.
Мордовиясь кизоста кизос касфнесыне сахарнай якстеряпсонь производствань объемтнень и лувондови лидеркс ПФО-са тя культурать урожайностенц коряс. 2016 кизоня сахарнай якстеряпста кочкафоль 1 миллион 70 тежянь тонна, сонь урожайностец пачкодсь 430 центнерс фкя гектарста.
Ромодановскяй сахарнай заводть вятиец азозе республикань Оцюняти, што тядде поладови предприятиять реконструкцияц. Тяни ни ушетф сахаросушильнай и сахароупаковочнай отделениятнень строямасна, тиф 72 од рабочай васта. Тяниень пингть заводса работай 600 ломань. Мекольдень вете кизотнень производствать модернизациянкса нолдаф 1,4 миллиард цалковай.
Мордовиянь Оцюнясь Владимир Волков путсь задача эсь пингстонза аделамс предприятиять реконструкциянц мархта сотф сембе мероприятиятнень и сяда товга ванфтомс производствань объемтнень касондомаснон. Тядде заводсь арьсекшни нолдамс 130 тонна сахар.
Мордовия Республикань Оцюнять Пресс-службац