Пяденцяста, 17 ноябрьста, Мордовиянь Оцюнясь Владимир Волков етафтсь выездной совещания «Юбилейный» ЖК-ть омбоце микрорайонцонза и «Тавла» ГЖК-нь строямань и благоустройствань объекттнень эса. Республикань Оцюнясь макссь оценка од проектть строяманцты, кона сотнесы Севастопольскяй ульцять «Мордовия Арена» стадионть мархта.
Од проектть кувалмоц – 800 метрада лама, келелмоц – 45 метра. Благоустройствань ошень од проектсь педа-пес пешеходнай, оцюшка пяльксоц ацаф аф фкя тюсонь тротуарнай плиткаса, тяса ладяфт емла архитектурнай формат, ваймосеманди скомнянят, тунда тяса тиевихть газотт и клумбат, тяни ни озафневихть декоративнай кусторкскят и шуфтонят. Проспектть благоустроендамста васендакиге мяльс сявфоль эряйхнень мяльсна. Новоселхнень ламошкасна – шаба мархта семьят, сяс проспектть лангса ладяф несколька налхксемань площадка, спортонь зонат, а стане жа активнай и сетьме ваймосеманкса территорият.
«Проспектсь – од микрорайонть «седи куцюняц», пуромома васта аф аньцек ошень эряйхненди, но и туристтненди. Сембось тяса должен улемс инь оцю уровеньца, качественнай и лама кизос саты!» - шарфтозе благоустройствать инкса ответственнайхнень мяльснон республикань Оцюнясь.
Совещаниять пингста стане жа корхтафоль проспектть территорияса Российскяй армиять честьс стелать ладяманц колга. Пцтай 9 метрань сереса сооружениять лангса кармай ащема Россиянь Вооруженнай вийхнень эмблемасна, а фронтальнай пяльксть кучкаса кармай валдопневи тяштьфкс - «Российскяй Армиянь проспектсь». Арьсекшневи, што тя знаковай объектсь арай аф фкя лацонь общественнай мероприятиянь етафнема вастокс.
Стане жа Мордовиянь Оцюнясь ванозе «Тавла» ГЖК-нь комплекснай застройкать площадкаса строительнай работатнень мольфтемаснон. Зданиянь сембе коробкатне ладяфт ни, етафтфт инженернай сеттне, мольфтеви помещениятнень лангонь и потмоширдень отделкасна. Владимир Волков путсь задача подрдчикть инголе работамс аф лотксезь, касфтомок объекттнень лангса рабочайхнень лувксснон и поладомок маластонь территориятнень благоустройстваснон.
Совещанияса примасть участия Мордовиянь Государственнай Собраниять Председателец Владимир Чибиркин, МР-нь Правительствать Председателец
Владимир Сушков, Саранск ошень округонь Администрациянь, проектнай и строительнай организациянь представительхне.
Мордовия Республикань Оцюнять пресс-службац