18 январьста Мордовиянь Оцюнясь Владимир Волков васетькшнесь Куйбышевскяй машина кинь начальникть Рашид Сайбаталовонь мархта. Васедемать пингста кемокстафоль 2017-2019 кизотненди марстонь работать и сотрудничествать колга соглашения Мордовия Республикать и «РЖД» ОАО-ть еткса.
Башка мяль документть эса шарфтф железнодорожнай инфраструктурань объекттнень эса транспортнай безопасностть обеспечендаманц коряс марстонь работати. Кепотьксонди, республикаса эряфс етафневи «Безопасный регион» проектсь, конань рамкаса кой-кона железнодорожнай переезттненди путовихть фото- и видиофиксациянь системат, мезсь лезды ламода кирьфтамс автомобильнай и машина китнень васедема вастсост правонарушениятнень лувксснон.
Соглашениять эса отмечаф стане жа, што кафта ширетнень мяльсна сяда товга поладомс марстонь работать Мордовияса 2018 кизонь футболть коряс миронь чемпионатть етафтоманцты Саранскяень и Рузаевкань транспортнай железнодорожнай объекттнень анокламаснон коряс. Тя кизефксть колга корхтамста республикань Оцюнясь Владимир Волков китькстазе Саранскяень и Рузаевкань машина кинь вокзалхнень эса пешеходнай сеттнень-перехоттнень одкстоптомаснон эрявиксшинц. Рашид Сайбаталов азсь анокши сявомс тя кизефксть личнай контроль алу, тяка лувксса, сувафтомс «РЖД» ОАО-ть инвестиционнай программас вяре азф мероприятиятнень лангс карьхцнень.
Васедемаса стане жа корхтафоль железнодорожнай транспортса пачфневи сталмотнень объемснон касфнеманц колга. Мордовиянь Оцюнясь отмечазе, што 2016 кизонь итокнень коряс промышленнай продукциянь производствась кассь 108 процентта, мордовскяй продукциять ламошкац потребительти пачфневи автомобильнай транспортса. Республикань Правительствати максф поручения ваномс инь оцю региональнай перерабатывающай холдинкнень продукцияснон лия региону пачфнеманкса железнодорожнай транспортть тевс нолнеманц коряс сотрудничествань кизефкснень.
Мордовия Республикань Оцюнять Пресс-службац