Мордовиянь Оцюнясь Владимир Волков примась участия муниципальнай райононь оцюнятнень мархта семинарса-совещанияса

Мордовиянь Оцюнясь Владимир Волков примась участия муниципальнай райононь оцюнятнень мархта семинарса-совещанияса

6 декабрьста Республикань Кудса етась «Актуальные вопросы развития муниципальных образовай Республики Мордовия» лем ала семинар-совещания муниципальнай райононь оцюнятнень мархта. Мероприятияса примасть участия Мордовиянь Оцюнясь Владимир Волков, республикань Государственнай Собраниять Председателец Владимир Чибиркин, МР-нь Правительствать Председателец Владимир Сушков, Мордовиянь Оцюнять Администрациянц вятиец Андрей Богатов, республикань муниципальнай райоттнень и Саранск ошень округонь оцюнясь, а стане жа республикань государственнай властень исполнительнай органонь вятихне.

Семинарть-совещаниять панжемста Владимир Волков отмечазе, тяддень кизонь пингта ингольдень итокне няфнихть касома эряфонь сембе ширетнень эса, но эряви сядонга ответственнайста маладомс 2019 и сяда товолдонь кизотненди платтнень анокламста. Региононь вятись башка мяль шарфтсь Россиянь Президентть В.В.Путинонь «О национальных целях и стратегических задачах развития на период до 2024 года» Указонц пяшкотькшнеманц лангс.

«Маластонь пингть 12 нацпроекттнень эряфс етафнемаснон рамкаса тевс сувафтови 67 федеральнай проект, эздост 59 проектть эса примай участия Мордовиясь. Тяниень пингть шумордама лангса региональнай проекттнень паспортснон анокламасна, коряваст сотцевихть целевой показательхне и финансированиянь объемсь. Азса, што проектнай работать рамкаса кочкафт ширетне, конат вешихть сяда оцю мялень шарфтома. Федеральнай проекттнень коряс минь максоме заявкат аньцек ся объекттнень строяманкса, конат афкукс кандыхть цебярь ломаттненди и экономикати. Тя эрямань од райоттне, школатне и идень саттне, больницятне, ФАП-не, культурань куттне – ся объекттне, конатнень инкса ломаттне максозь вайгяльснон кочкаматнень эса, конатнень колга эняльдсть эсь наказснон эса», - мярьгсь Владимир Волков.

Мордовиянь Оцюнясь китькстазе, што национальнай проекттнень эффективностьсна ламода кармай ащема районца етафневи работать эзда. «Конкретнай результатт тейнек эряви сатнемс аф башка учреждениятнень эса, а сембе территориятнень эса, коса эряйхть ломатть: ошса, поселкаса, велеса. Тейнек эряви, штоба тефне полафнельхть цебярь шири, штоба ломаттне няелезь и марялезь цебярь шири полафткснень», - отмечазе республикань Оцюнясь.

Владимир Волков азондсь маластонь кота кизотненди региональнай власттнень планцнон колга. «Эрь районти лац шарьхкодема эсь вастоц развитиянь программатнень эса, арьсемс, кодама федеральнай и республиканскяй лезкс лангс ули кода надиямс, штоба ладямс эсь бюджетнай политикаснон», - мярьгсь республикань вятись.

Стане жа Мордовиянь Оцюнясь азозень задачатнень, конат путневихть муниципальнай образованиянь вятихнень инголе. Васендакиге, тя од эряма вастонь стройсемась и аварийнай эряма васттнень эзда ломаттнень етафнемасна, китнень строямасна и петемасна, коммунальнай инфраструктурать одкстоптомац, муниципальнай образованиятнень инвестиционнай мялень шарфтомаснон цебярьгофнемац. Фкя инь васенце задачакс азфоль населениять афкуксонь доходонзон касфнемац и эряфть кувалгофнемац.

«Аш месть корхтамс, тяса лама тевда, - китькстазе Владимир Волков. – Касфтомс одс шачихнень лувксснон аш кода, кда аф панчсемс од рабочай вастт, паннемс цебярь зарплата, макссемс эряма вастт, цебярь образования, качественнай медицинскяй обслуживания. Башка мяль – заработнай платать касфнеманцты. Минь целеньке – сувамс заработнай платать коряс странань 50 инь цебярь региоттнень еткс. Республикаса пуроптови специальнай рабочай группа, конань кармай вятемонза Правительствать Председателец В.Ф.Сушков. Ванови зарплатась эрь предприятиять эса. Минь аф ащетяма каршек сянди, штоба вятихне получсельхть оцю зарплата, но эста теенза обеспечендамат и сотрудникне».

Республикань Оцюнясь лятфтазе совещаниянь участникненди, што путф задачатнень решандамань результаткс должен арамс ломаттнень эряфса цебярь полафтксне. «Ломаттне должетт шарьхкодемс цебярь шири полафткснень – вов мезсь инь главнайсь!»

Семинарть-совещаниять пингста доклад мархта выступандасть министерствань вятихне.

Мордовия Республикань Оцюнять пресс-службац