10 октябрьста ВДНХ-ть территорияса ушедозе эсь работанц «Золотая осень-2018» Российскяй агропромышленнай выставкась. Мордовиянь делегациять, коза сувасть АПК-нь, пищевой и перерабатывающай отраслянь вятихне, фермерскяй хозяйствань представительхне, вятезе республикань Оцюнясь Владимир Волков.
Республиканскяй производительхнень продукциясна выставкаса няфтьфоль 23 предприятиятнень мархта: тя «Ичалковский» сыродельнай комбинатсь, «Сармич» сыровареннай заводсь, «Октябрьская», «Новотроицкая» и «Норов», «Мечта», «Юбилейное» агрофирматне, «Атемарская» птицефабрикась, «Талинась», «Ламзурьсь», Большеберезниковскяй хлебзаводсь, «Саранский» консервнай заводсь, «Тепличнайсь», «Мир цветовсь», «Саранский дистиллерссь», «Биосферась», «Глубинкась», «Аквасарсь», «Рузовось», «Старошайговагропромснабсь», «Мордовские пенькозовттне», а стане жа «Караулов С.П.» и «Кулагин А.А.» крестьянско-фермерскяй хозяйстватне.
Россиянь Правительствать Председателец Дмитрий Медведев, панжемок выставкать, китькстазе, што маряй гордость российскяй АПК-ть инкса, сянкса, што велень хозяйствась арси экономикань высокотехнологичнай, тяниень пингонь секторкс. Премьер-министрсь отмечазе, што Правительствась арьсекшни виияфнемс велень территориятнень, стройсемс кит и эряма вастт, школат и клубт, «тиендемонза семботь, штоба велеса ломаттне эряльхть ошеннетненди мала условияса, штоба синь улель мялень салай работасна, цебярь зарплатасна». Стане жа Дмитрий Медведев китькстазе, што эряви виияфнемс велень хозяйствань продукциять экспортонц. «Путневи задача касфтомс ширеса мишендеви велень хозяйствань продукциять лувксонц кафтонь-крда. Минь карматама решандакшнема сонь международнай кооперациять и экспортть коряс национальнай проектть рамкаса», - мярьгсь Правительствать Председателец.
Мордовиянь Оцюнясь Владимир Волков агропромышленнай выставкать работанц рамкаса етафтсь несколька рабочай васедема деловой крукнень представительснон мархта республикаса инвестиционнай од проекттнень эряфс етафнемаснон колга. Тяконь лувксса региононь вятись корхтась немецкяй инвесторхнень мархта Мордовияса оцю производительность мархта молочнай комплекснень строямаснон колга, а российскяй инвесторхнень мархта – Большеигнатовскяй районца тепличнай комплексть
строяманц квалма. «Минь шарфнетяма мяль аф аньцек продукциять объемонзон касфнемаснон лангс, но и од рабочай вастонь панчсемать лангс, коса тя сембода пяк эряви», - китькстазе Владимир Волков.
Корхтамок странань фкя инь главнай агропромышленнай форумть колга, Мордовиянь Оцюнясь отмечазе: «Аграриеньконь сатфкссна макссть возможность достойнайста няфтемс республиканьконь «Золотая осень-2018» выставкаса, Мордовиясь сувси странаса сивольть, алхнень и лофцть производстванц коряс вете инь васенце региоттнень лувксс. Велень хозяйстваса производствань объемтне мекольдень вете кизотнень кассь 30 процентта. Велень хозяйствань продукциять объемонзон касфнемаснон эзда ащи перерабатывающай предприятиятнень цебярьста работамасна, коса стане жа няеви касома. Минь лац шарьхкотькшнесаськ, што импортть полафнемац и экспортть касфнемац – тя фкя и сяка кисьм велень хозяйствать виияфнеманкса. Сяс вяттяма оцю работа, штоба келепнемс представительстваньконь омба масторонь продовольственнай рынкатнень эса. Тяниень пингть АПК-нь продукциянь экспортть объемонза республикаса арасть 15 миллион доллар. Минь путнетяма инголенк задача колма кизонь потмоса касфтомс экспортть объемонзон 50 миллион долларс».
Экспортть виияфнеманц коряс корхтамась поладови выставкать работанц рамкаса 11 октябрьста. Мордовиянь Оцюнясь Владимир Волков тии доклад деловой завтракть пингста, кона лемтьф АПК-са экспортти, и азсыне предложениятнень, конат сотфт омба масторонь рынкатненди лисеманкса российскяй производительхнень ширеснон кирнеманц коряс.
Мордовия Республикань Оцюнять пресс-службац