Мордовиянь Оцюнясь Владимир Волков 12 октябрьста примась участия Мордовия Республикаса цифровой эфирнай вещаниять тевс сувафтоманц коряс церемонияса. Мероприятияса стане жа примасть участия ВГТРК-ть генеральнай директоронц заместителец, региональнай департаментть вятиец Рифат Сабитов, РТРС-ть генеральнай директоронц заместителец – радиовещаниянь и радиосвязень департаментть вятиец Виктор Горегляд, Приволжскя федеральнай округонь и Россиянь лия региононь ВГТРК-нь филиалхнень вятисна.
Торжественнай пяльксть ушедомс «Мордовия» ГТРК-ть директороц Наталия Грановская етафтсь инжихненди импровизированнай экскурсия, няфтемок телецентрать колма кизоста одкстоптф производственнай помещениянзон и од Радио-Кудть, кона козякофтф тяниень пингонь од техникаса.
Выступандамок торжественнай церемонияса, республикань Оцюнясь отмечазе, што Мордовиясь лия региоттнень еткста васенцекс пцтай кемонь кизода инголе пилотнай проект лаца нолдазе эсь мультиплексонц, пачфтемок цифровой качествань картинкать республикань инь ичкоздень уженятненди.
«Тячи цифровой вещаниять тевс нолдамац – тя оцю события сембе регионти: Мордовиянь эряйхнень тяни эвондась возможностьсна примсемс питнефтома цифровой качествань 20 телевизионнай канал. Тянкса етафтфоль оцю работа цифровой технологиятненди етамать коряс федеральнай программать рамкаса. Тячи республикаса пцтай сембонди ули кода ваномс цифровой вещания (99,7 процентти). Тяфтамот мировой вешфксне, и Мордовиясь теест педа-пес отвечай», - мярьгсь Владимир Волков.
Мордовиянь Оцюнясь отмечазе, што цифровой вещаниять тевс нолдамац етай республикати мяляфтови 2018 кизоня. «Саранскяйса миронь чемпионатть лац етафтомац кемокстазе Мордовиять имидженц кода фкя инь цебярь, технологическяй ширде касонды-вииякшни региононь. Тянь удалась сатомс тяконь лувксса и массовай информациянь средстватнень чемпионатти
анокламста и башка сонь етафтомстонза цебярь работаснон вельде. Регионть виияфнемасонза сактфксоньке, социальнай инфраструктурань объекттнень стройсемасна, эряфонь сембе ширетнень эса сатфксонь сатнемась – сембе тя важнай тематне фалу мушендсть васта тинь теле- и радиоэфиронтень эса», - мярьгсь Владимир Волков.
Мордовиянь Оцюнясь поздравляндазе «Мордовия» ГТРК-нь коллективть од уровеньц лисемаснон мархта, арьсесь сяда товолдонь творческяй сатфкст, а стане жа азсь спасибамань валхт ВГТРК-нь руководствати региональнай телерадиокомпаниять тя проектть эряфс етафнемаса ширенц кирнеманкса.
Торжественнай мероприятиять пингста телекомпаниянь инь цебярь сотрудникне получасть государственнай и ведомственнай казнет.
Мордовиянь Правительствать Всероссийскяй государственнай телерадиокомпаниять мархта сяда товолдонь марстонь тевонь вятеманц колга корхтафоль Мордовиянь Оцюнять Владимир Волковонь ВГТР-нь генеральнай директорть заместителенц Рифат Сабитовонь мархта рабочай васедеманц пингста. Васедемаса примась участия «Мордовия» ГТРК-ть директороц Наталия Грановская.
Мордовия Республикань Оцюнять пресс-службац