Мордовиянь Оцюнясь Владимир Волков васетькшнесь «Российские коммунальные системы» компаниянь группать руководстванц мархта

Государственно-частнай партнерствань условиятнень лангса ЖКХ-нь сфераса сотрудничествань кизефкснень коряс корхтафоль  19 январьста Мордовиянь Оцюнять Владимир Волковонь «Российские коммунальные системы» компаниянь группать руководстванц мархта васедеманц пингста. Пуромксса участия примасть Мордовия Республикань Правительствать Председателец Владимир Сушков, сонь заместителец Игорь Чадов, Саранскяень мэрсь Петр Тултаев, профильнай министерствань вятихне.

«Российские коммунальные системы» компаниянь группась – Россияса водоснабжениянь и водоотведениянь инь оцю операторсь. Тяда башка, работай теплоснабжениянь и энергетикань сфераса. Директоронь Советть председателец Григорий Терян азсь оцю мяль Мордовиять территорияса проекттнень эряфс етафтоманкса.

Республикань Оцюнясь Владимир Волков азозе регионца коммунальнай хозяйствать одкстоптоманц эрявиксшинц. Валонзон коряс, эряви решандамс Чамзинка и Комсомольский поселкатнень эса водоснабжениянь прябалать, коса сеттнень и оборудованиять сирексшисна вяти коммунальнай услугатнень качестваснон киреманцты. Прябалат улихть и лия райоттнень эса, кепотьксонди, Рузаевскяйса, Торбеевскяйса, Ковылкинскяйса, Атяшевскяйса. Ламоц проекттнень ули кода етафтомс эряфс Саранскяйса, тяка лувксса 2018 кизонь футболть коряс миронь чемпионатти анокламатнень рамкаса.

Владимир Волков китькстазе, што эряви сембе ширде арьсемс сотрудничествань кизефкснень. Сонь поручениянц коряс тя тевсь максови рабочай группати, конань вятемонза кармай Мордовия Республикань Правительствать Председателенц заместителец Игорь Чадов.

Мордовия Республикань Оцюнять Пресс-службац