Мордовиянь Оцюнять Владимир Волковонь лемс сась благодарственнай серма эряфкшу ломаттнень компьютернай грамотностьснон касфнеманц коряс национальнай интереснень эряфс етафнемань Координационнай центрать вятиенц Виктория Коротаевать эзда.
Координационнай центрась тись итокт «Спасибо Интернету-2018» компьютернай грамотностть тонафнемаса пенсионерхнень личнай сатфксснон коряс IV всероссийскяй интерактивнай конкурсти. Эсонза Мордовия Республикась занязе 22 вастть. Республикань пенсионерхнень эзда прважафоль 39 работа (конкурсс саф работатнень марстонь лувксснон эзда 1,15 процентсь). Конкурсса примась участия 3500 пенсионер Россиянь 74 регионцта. Участникнень средняй кизосна – 63 киза. Инь сирети – 95 киза.
«Спасибатама теенть и Республикань Правительствати компьютернай грамотностти тонафтомать коряс работань вятеманкса», - корхтави сермать эса.
Отмечасаськ, што конкурсонь авторхнень-призерхнень спискаснон ули кода няемс azbukainterneta.ru порталста «Конкурс» разделса.
Конкурсонь результаттнень коряс организаторхне анокласазь эряфкшу граждаттнень компьютернай грамотностьснон коряс Россиянь региоттнень рейтингснон. Тя информациясь пачфтеви РФ-нь Президентть Администрацияв, а стане жа ведомстватненди, конат работайхть тянь коряс.
Лятфтасаськ, всероссийскяй конкурссь етась 2018 кизонь 18 апрельста сявомок 8 октябрти молемс. Сонь пуроптыенза-етафтыенза: Ростелеком ПАО-сь, Россиянь Пенсионнай фондсь, эряфкшу граждаттнень компьютрнай грамотностьснон виияфнеманц коряс национальнай интереснень эряфс етафнемань Координационнай центрать лезксонц вельде. Участиянь примама терневсть пенсионерхне и эряфкшу кизонь граждаттне (50+), конат тонафнихть компьютерса работамати кода эсь вийсост, стане и специализированнай школаса тонафнемста.