Лятфтасаськ, што Артём Здунов путозе Батыр Эмеевонь Саранск ошень округти кураторкс, сон вятьсыне кинь строямань и петемань, а тяфта жа сатови и эсь пингстонза ошса пассажирскяй перевозкань улемать коряс кизефкснень.
Тяфтама эрявикс темань ваномаса, ошень администрацияса, примасть участия РМ-нь транспортть и кинь хозяйствать коряс Государственнай комитетть Председателец Валерий Кандрин, а тяфта жа муниципальнай и частнай перевозчиконь представительхне.
Батыр Эмеев башка китькстазе, што общественнай транспортонь сатомашинь кизефкссь ащи Мордовиянь Оцюнять Артём Здуновонь конрольса и вещи сяда курок примаф конкретнай решеният.
Вице-премьерсь азондсь покоди ялганзонды эсь мониторингонц результатонзон колга, конанц сон ётафтозе тячи шобдаса час пикста, эхянь прабалань маршруттнень эзга.
«Азса видеста, ситуациясь авардемань! Автобусне пяшксет сельмода вельф, эрь кодама остановкаса ломаттне ащихть 30-40 минутань, а къда теест и удалай сувамс транспортти, ардомс сави аф пяк цебярьста, теснаста», - азозе сон.
Ульсь китькстаф, што тяниень пингть 50 % сембе пассажиропотокть эзда Саранскяйса сявоньдсы эсь лангозонза «Горэлектротранс» муниципальнай предприятиясь, омбоце пяльксть сявоньдьсазь колма частнай компаният. Кучкань цифрать коряс Мордовиять столицаса маршрутс эрь шиня лисендихть 200 машина малава: тя лама ломанень тялькфтай автобуст, троллейбуст, а тяфта жа маршруткат. Аньцек сякокс, кода няеви, тя лувкссь аф сатни. Тевсь стакалготкшни нинге сянкса, мес машинатне фалу анайхть питни петема, а транспортнай предприятиятненди аф сатнихть кадратне, пенсионерне тушендыхть, а одтне аф мяль вельде молихть водителькс, аф ваномок сянь лангс, што зарплатась отрасляса цебярь - 100 тежянь цалковайти молемс.
«Ломаттнень аф эряви пичефтемс! Минь – эрьсь эсь вастсонза – ащетяма тоса эхянь сянкса, штоба марс пяшкодемс нят прябалатнень. Эряви мумс лисема тя ситуациять эзда», - китькстазе Батыр Эмеев.
Обсуждениясь мольсь частть малава. Эрьсь перезозчикнень эзда азозе, што анок молемс эрявиксс аськолксненди.
«Васенце транспортнай предприятиянь ассоциациянь» директорсь Валентин Копылов азозе, што сонь компанияц мольфтсыне пцтай сембе пригороднай маршруттнень, а тяфта жа №28 и №10 маршруттнень.
«Сянь мельге, штобы аф ламода емлалгафтомс час пикста транспортть аф сатоманц, шобдава и илять минь транспортонеке кармай якама 10 вастс 6 минутань интервалса», - мярьгсь сон.
Эхянь тяфта тиихть и лия перевозчикне. «Пассажирские Перевозки Мордовии» НП-ть директороц Владислав Кемяшов макссь вал касфтомс час пиконь пингста якай составть лувксонц.
«Минь уже тиеме поправкат графикненди. Ламоц рейснень шинь покодемань режимть эзда ётафтынек шобдаваннети. Инь стака маршруттенди минь нолдатама аф 20 техникань еденица, а 26. Тя уже максси няеви результат. Работась кармай мольфтевома сяда тов», - китькстазе Владислав Кемяшов.
«Горэлектротранс» Саранскяень муниципальнай предприятиянь директорсь Борис Боровой китькстазе, што путф задачась обязательна кармай пяшкотьф.
«Минь мутама кода касфтомс линиянди машинань лувкссь, ушедттама покодема сязендьф графикнень мархта, селгондома шобдавань и илядень час пикнень, мзярда ошса сембода оцю трафиксь», - мярьгсь сон.
Илять 6 майста Батыр Эмеев азондсь ушетф покодемать колга Артём Здуновонди. Республикань руководительсь китькстазе, што транспортнонь сатомашинь кизефкссь ошень округса», - пяк эрявикс.
«Общественнай транспортть якаманц лангс сашенды лама жалоба. Ошти тя прябалась аф пяшкодеви . Эряви лездомс», - мярьгсь сон.
Васенце цебярь результаттне транспортникнень покодема учевихть маластонь шитнень.
Батыр Эмеев сюконясь Артём Здуновонди автобусонь петемань кизефксть пяшкодеманц инкса - курок синь лисихть линияти.
Сяка пингть правительствась арьси полафтомс водителень аф сатомашинь тевть. Прявкссь, што транспортнай прябалась тусь вастста и валомне кармай пяшкотькшневома.