13 июльста Владимир Волков етафтсь оцю выездной совещания 2018 кизонь футболть коряс Миронь чемпионатти анокламань объекттнень эса. Тя мезть региононь вятись ванозе кода мольфтеви «Тавла» гостинично-жилой комплексть, сонь социально-бытовой инфраструктуранц строямац и благоустройствац. Тяда башка, Оцюнять аф оцю пингс тевонзон тиендисна макссь оценка Саранскяйса аэропортовай комплексть реконструкцияса пяшкотьф работатнень объемснонды. Совещанияса примасть участия Мордовия Республикань Правительствать Председателец Владимир Сушков и Саранск ошень округонь оцюнясь Петр Тултаев.
Чемпионатти анокламань объекттнень еткса «Тавла» ГЖК-сь занци башка васта, вдь тя аф аньцек од жилой застройкань васта, но и од микрорайононь марнек инфраструктурать центрац, кона сельме инголе кассь од стадионть маласа. Отмечасаськ, што кафта 16 этажса и кафта 14 этажса гостиничнай зданиятне пцтай анокт, комплексти пачфтьфт инженернай сембе сеттне, мольфтеви потмоширдень отделкась, оборудованиять монтажец. Гостиничнай комлексть тевс сувафтомац етай кафта этапса – тяддень декабрьста и сай кизонь март ковста. Августста подрядчиксь арьсекшни няфтемс тя куттнень эса квартирань рамайхненди пилотнай номерть, коса тиф отделкась и ули сембе эрявикссь. Владимир Волков тага весть лятфтазе строительхненди, што куттнень строямаснон мархта ряцок работама жилой застройкать территориянц благоустройстванц коряс.
Од микрорайонца китнень ламошкаснон строямаснон стане жа арьсекшневи шумордамс строительнай зенонть аделавомс. Тяка жа пингть 2-це микрорайонть территорияса эвондай оцю бульвар. Тавла ляйть маласта территориять благоустройствац ваймосемань зонать анокламанц мархта мольфтеви ни. Од дамбась лезды касфтомс ляйть уровененц 2,5 метрада. Владимир Волков азсь мяль лацкас сьмекамс-арьсемс тяса велодорожкатнень и роллерхненди трассань строямать мархта сотф кизефксть, а стане жа тиемс шуваронь пляж и озафнемс шуфтонят. «Тяса должен улемс од микрорайононь эряйхненди ваймосеманкса пяк цебярь парковай зона, коза кармайхть сашендома сембе ошеряйхне!»
Сяда тов ванфоль 2-це микрорайонца од школать, полициянь отделть, торговай центрать, од поликлиникать строямасна. Сембе ня объекттне строявихть марса чемпионатонь объекттнень мархта, синь пяк эрявикст ошеряйхненди. Главнайсь, мезть лангс шарфтозень заказчикнень и подрядчикнень мяльснон региононь вятись, - пингсь, конанди эряви кирдемс, и территориятнень благоустройствасна, кона важна мольфтемс объекттнень строямаснон мархта ряцок.
Тяка шиня Мордовиянь Оцюнять аф оцю пингс тевонзон тиендисна макссь оценка Саранск ошень аэропортовай комплексть реконструкциянц мольфтеманцты. Эряви азомс, работатне тяса мольфтевихть сембе вийса – сембе пингонь терминалть зданияц анок аф аньцек лангс ванозь, но пцтай педа-пес пяшкотьф инженернай оборудованияса. Связень и безопасностень систематне, инженернай коммуникациятне, электроннай составляющайсь, высокотехнологичнай оборудованиясь – семботи тянди тиеви монтаж, и курокста объектсь ули анок тевс сувафтоманкса. Стане жа мольфтеви мзярошка пингонь терминалть строямац. Пассажирскяй терминалхне – тя центральнайхне, но реконструкциянь аф фкя и тяка объекттне. Мархтост ряцок Саранскяень аэропортсь получай искусственнай покрытия мархта од взлетно-посадочнай полоса, рулежнай кинят и тяниень пингонь аэропортовай инфраструктура, кона отвечай инь оцю отраслевой вешфксненди.
Илядь Владимир Волков етафтсь Республикань Кудса расширеннай рабочай заседания чемпионатонь объекттнень строямаснон коряс. Эсонза примасть участия МР-нь Правительствать Председателец Владимир Сушков и пцтай сембе министорхне, ошень руководствась, а стане жа сембе генподряднай и подряднай организациятнень представительсна.
Лама корхтафоль мундиалень эрь объектть эса работатнень вятемаснон колга. Тяконь лувксса корхтамась мольфтевсь графикнень колга и конешна строямать вишкопнеманц квалма. Владимир Волков макссь кеме порученият строительнай организациятненди касфтомс рабочайснон лувксснон, штоба недяляньботмоста лисемс кафта рабочай сменас.
Мордовия Республикань Оцюнять Пресс-службац