Мордовия Республикань Оцюнять аф оцю пингс тевонзон тиендисна Владимир Волков етафтсь рабочай васедема Рузаевскяй райононь оцюнять Вячеслав Кормилицынонь мархта. Корхтамась мольфтевсь территориять социально-экономическяй ширде виияфнеманц колга.
Владимир Волков китькстазе, што Рузаевкать виияфнемац пяк эрявикс республикати. Аф кржа средства тядде нолдави кинь строяманкса и ошть благоустройстванкса. Тяниень пингть мольфтеви кинь строямась Некрасовонь и Трудовой ульцятнень эса, ушетф ремонт Станиславскяень ульцянц эзга. Стане жа тиеви ремонт кафта магистрально-трассовай китненди: Марксонь – Ленинонь ульцятнень эзга и Маяковскяень – Луначарскяень – Калининонь ульцятнень эзга. Од кит эвондайхть Левжа и Татарскяй Пишля велетнень эса. Марса кинь строяманкса нолдави 90 миллион цалковайда лама. Куд пирьфнень благоустройстванкса нолдави 11 миллион цалковай. Петеви-тиеви ошень парксь – тянкса нолдави 2,3 миллион цалковай. Вячеслав Кормилицин пачфтезе Владимир Волковонди, што кизонь пингть аделавомс кинь строямань тефнень оцюшка пялькссна кармай пяшкотьф ни.
Стане жа корхтафоль ошть севернай микрорайонцонза 800 вастонди од школать и Левжа поселкаса 70 вастонди идень садть строямаснон колга. Ня объекттне сувафтомат тевс кизоть аделавомс.
Тяда башка, корхтамась мольфтевсь Рузаевскяй районца од рабочай вастонь панчсемать колга. Тяниень пингть аноклави панжеманцты «Рост-Рузаевка» мебельнай фабрикась, коса тяни мольфтеви оборудованиять монтажец. Проекттнай мощностти лисемда меле фабрикаса кармай работама 300 ломань. Маластонь пингть ушедсы эсь работанц тага фкя од предприятиясь – Рузаевскяй ремонтнай локомотивнай депось. Мольфтеви работа нинге несколька проекттнень коряс, конат водендафт населениять занфшинц обеспечендаманкса. Владимир Волков лятфтазе, што МР-нь Госсобранияти Посланиять эса путф задача маластонь кафта кизотнень панжемс Рузаевкаса аф тежяньда кржа од рабочай васта. «Инвесторонь вешендемати, конат анокт панчсемс од производстват, тяконь лувксса и Рузаевксяй районца, башка мяль шарфнема кода республиканскяй, стане и муниципальнай власттненди», - китькстазе республикань вятись.
Мордовия Республикань Оцюнять Пресс-службац