Шавшиста, 10 июльста, Владимир Волков етафтсь выездной совещания Республиканскяй клиническяй больницять виияфнеманц мархта сотф кизефкснень коряс, коса примасть участия Мордовиянь Правительствать Председателец Владимир Сушков и здравоохранениянь министрсь Михаил Морозов.
Фкя инь васенце задачакс, конань путозе республикань Оцюнясь медучреждениять од руководстванц инголе, арась сярядихненди высокотехнологичнай лезксонь макссемась. «Улихть сембе возможносттне сянкса, штоба и республикань эряйхне, и маластонь региононь пациенттне получсельхть высокотехнологичнай лезкс Республиканскяй клиническяй больницяса. Тянкса улихть сембе технологическяй возможносттне. Аф сатни кадратнень мархта сотф кизефкссь решандама кода можна сяда курокста. Нюрьхкяня пингста эрявихть тонафнемс доктороньконь – федеральнай или омба масторонь центратнень эса, а кда эрявксты – тердемс высококлассна специалистт лия региононь оцю медицинскяй центратнень эзда. И, конешна,
сяда тов мольфтемс работать медицинскяй учрежденияньконь видеса научнай школань панчсемать коряс, васендакиге – МРКБ-ть видеса» - китькстазе Владимир Волков.
Сергей Ладяев азондсь Мордовскяй республиканскяй больницять и Перинатальнай центрать марс пуроптомаснон колга. «Тяни минь лац-ряц тонафнесаськ региоттнень опытснон, коса ня учреждениятне пуроптфт ни и лац работайхть», - азозе МРКБ-нь главнай врачсь.
Владимир Волков нинге весть китькстазе РКБ-ть ведущай федеральнай центратнень мархта сотксонь кирнеманц эрявиксшинц, башка телемедицинань кизефкснень коряс.
Тяда башка, корхтафоль РКБ-са макссеви высокотехнологичнай медицинскяй лезксть финансированиянц колга. Корхтамась мольфтевсь Республиканскяй клиническяй больницять видеса стакаста сярядихнень транспортировкаснон коряс санитарнай авиациять работанц ладяманц коряс. Тянь коряс порученият максфтольхть МР-нь здравоохранениянь министрти Михаил Морозовонди.
Мордовия Республикань Оцюнять пресс-службац