Мордовия Республикань Оцюнять аф оцю пингс тевонзон тиендисна Владимир Волков етафтсь выездной оперативнай совещания «Юбилейный» эрямань комплексть строяманц мархта сотф кизефкснень коряс. Совещанияса примасть участия Мордовиянь Правительствать Председателец Владимир Сушков, Саранск ошень округонь оцюнясь Петр Тултаев, профильнай министерствань и подряднай организациянь вятихне.
Тяниень пингть объекттнень эса, конат строявихть тя районца, мольфтеви вии работа – сембось эряви сувафтомс тевс кизоть аделавомс. Башка мяль, кода китькстазе территориятнень ваномста Владимир Волков, шарфтома Тавла ляйть трванзон благоустройстваснонды – тяса работама сяда курокста.
«Юбилейный» эрямань комплексти афкуксонь мазоптомбялькс арай од школась, сельмос пови тюсонза конань няевихть ичкозде ни. Владимир Волков,кирдемок школать строяманц башка контроль ала, ванозень тонафнемань помещениятнень и лядсь кепотьф мяльса. Школаса улихть кафта бассейнат – оцю и емла, кафта спортивнай залхт, хореографическяй зал, оцю стадион, лама спортивнай площадка.
Тяниень пингть тонафнемань заведениясь аноклай тонафнихнень примамаснонды. Аньцек васенце класста тяса кармай кафкса. Родительскяй собраниятне, конат сотфт тонафнемать ушедоманц мархта, мольфтевихть сембе вийса. Республикань вятись сувась эздост фкяти. Тядятне-алятне азсть Владимир Волковонди благодарностень валхт образованияти оцю мялень шарфнеманкса: од школась, валснон коряс, аньцек кеняртьфни. Мордовиянь лидерсь кемокстазе: «Тавла» образованиянь центрась ( тяфтама лем максф тонафнемань од заведенияти) должен арамс сай пингонь эталоннай школакс. Школась козякофтф тяниень пингонь учебно-методическяй оборудованияса, тяса кармайхть нолневома тевс тонафнемати инь од малаткшнематне, башка мяль кармай шарфневома математическяй профильти.
Республикань вятись шарфтсь мяль школать маласта территориять благоустройстванцты. Тонафнемань од кизоти сон кармай тяфтама жа мазы и сельмос пови, кода сонць зданиясь.
Владимир Волков ванозень эрямань комплексть и лия объектонзон. Выездной совещаниять итогонзон коряс примафтольхть решеният, конат водендафт строительнай работатнень вишкоптоманкса.
Мордовия Республикань Оцюнять Пресс-службац