Мордовиянь Оцюнясь Владимир Волков сяда тов поладозень республикань промышленнай предприятиятнень руководительснон мархта рабочай васедематнень. Ульсь васедема «Оптикэнерго» компаниянь группать вятиенц – директоронь Советть председателенц Эвир Боксимеронь и генеральнай директорть Михаил Боксимеронь мархта.
Эвир Боксимеронь валонзон коряс, 2016 кизось компаниянь группати удалафоль – производствась кассь 111 процентта. «Оптикэнерго» предприятиясь фалу занцесыне васенце васттнень республикань Минпромть рейтингса. Сембоц группать предприятиянзон эса работай 1300 ломань. Кизоть итогонзон коряс средняй зарплатась тяса 40 тежянь цалковай.
Рабочай васедемать пингста корхтафоль компаниянь группать 2017 кизонди планонзон колга. Васенце надияматне сотфт «ЭМ – Кабель» заводса од производствать нолдаманц мархтра. Од цехсь, конань строямац ушетфоль мелянь кизоня, кармай нолнема цебярьгофтф характеристика мархта импортонь полафни кабельнай продукция. Тя лезды ламода касфтомс производствань объемть и. Строямань васенце очередть мощностец пачкодсь 3 миллиартт цалковайс кизоти. Строямась мольфтеви графикс коре, апрель ковста ни арьсекшневи кярьмодемс оборудованиять монтаженцты.
Республикань Оцюнясь отмечазе од производствать нолдаманц эрявиксшинц, лемдемок сонь «заводса заводкс». «Тяфтама предприятиятне пяк эрявикст республикань экономикати – тяниень пингонь, оцю производительностень, коса нолневи инновационнай продукция. Тяда башка, од производствать нолдаманц вельде ули кода панжемс цебярь зарплата мархта 200 од работама васта – тя республикати стане жа пяк важна», - китькстазе Владимир Волков.
Заводть арьсекшневи сувафтомс тевс тяддень августста.
Аф ащекшнихть фкя вастса и компаниянь группать лия предприятиянза. Эвир Боксимер няфтезе республикань Оцюняти нефтянной отраслянди импортонь полафни од продукциянь образецнень, конат аноклафт «Сарансккабель – Оптика» заводса.
Мордовия Республикань Оцюнять Пресс-службац