Владимир Волков макссь государственнай казнет коронавируснай инфекциять каршес тюреманкса

Владимир Волков макссь государственнай казнет коронавируснай инфекциять каршес тюреманкса

11 сентябрьста Республикань Кудса етась торжественнай пуромкс, конань пингста казьфтольхть здравоохранениянь системань, санитарно-эпидемическяй безопасностень службань работникне, специалисттне и волонтерхне, конат примасть активнай участия коронавируснай инфекциять каршес тюремаса. Участникнень лямбоста приветствондазень Мордовиянь Оцюнясь Владимир Волков и макссь теест оцю казнет.

Пуромфнень инголе корхтамста региононь вятись азозе, што пцтай пяле киза ни Мордовиясь эряй оцю анокшинь режимса и здравоохранениянь системать лангс оцю сталмонь кирнезь. «Тячиень эпидситуациясь аф максси медицинскяй работникненди, санитарнай контролень оргаттненди лафчемкшнемс и ваймамс. Корхтамс коронавирусть сяськоманц колга, конешна, рана. Мзярс аш вакцина, вируссь лядонды мархтонк. Стане жа тефне сталгофневихть гриппть и ОРВИ-нь коряс од эпидсезонть мархта, кона ушеткшни сексеть самста. Но шарьхкотькшневи, што обществать ширде виень путнемась и, конешна, тинь героическяй работанте лездсть аф ламода потафтомс эпидемиять».

Аф ваномок сембе сталмотнень лангс республикань здравоохранениянь системась кирдезень синь. Аноклафоль и нолдафоль тевс пцтай 2 тежятть инфекционнай васта, тя ветень-крда сяда лама сянь коряс, мзяра арьсекшневсь тяда инголе, етафтф оцюдонга оцю работа синь кислородса, ИВЛ-нь аппаратса козякофтоманкса.

Урмать текшенц пингста Мордовиянь эрь колмоце больницясь кой-мзярода етафтфоль «ковиднай» госпиталенди. Тя 18 пчксемань учреждения республикань райоттнень пялесост. Республиканскяй наркологическяй диспансерть эзда сявомок Идень республиканскяй больницяти молемс. Оцюдонга оцю сталмот прасть врачнень-реаниматолокнень и Скорай помощень станциянь бригадатнень лангс. Пцтай шинек-венек трудендасть специалисттне, конат тиендсть КТ-исследованият, башка 5№ республиканскяй больницянь поликлиникаса.

Пандемиять пингста «коронавируснай» сярядихненди тифоль кемотть экстреннай операция. Владимир Волков шназе Республиканскяй клиническяй больницянь, Катковонь лемса больницянь и Идень республиканскяй больницянь врачнень-хируркнень профессиональнай работаснон, а стане жа отмечазе башка ответственнай миссиять, кона прась Рузаевскяй районнай больницянь сотрудникнень лангс, коса шачфнесть коронавирусса сяряди пеку аватне.

«Мялезе спасибамс эрьти еткстонт лац ладяф и профессиональнай работанкса! Эпидемиять пингста оцю коллегаснон мархта ряцок «ковиднай» госпитальхнень эса работасть 118 студент и ординатор. Тячи минь казьсаськ кой-конатнень еткстост. И мон спасибан теест смелшинкса и сай пингонь профессияснонды вернайкс улеманкса», - мярьгсь Мордовиянь Оцюнясь.

Лятфтафтольхть и ся од задачатне, конатнень савсь решандамс Роспотребнадзоронь специалисттненди. Можна мярьгомс шава вастста тифоль база ПЦР-тестированиянди, аноклафтольхть башка рекомендацият эпидемиянь условияса экономикань эрь сферать, эрь предприятиять работаманкса. Тячиень шити тестт тифтт Мордовиянь эрь ветеце эряйти, етафтф пцтай 185 тежянь исследования. И тя работась аф кирьфневи. Эрь шиня тиендеви тежяньда лама тест. Минь санитарно-эпидемическяй службаньконь эффективнай работанц отмечазе Россиянь Президентсь В.В.Путин.

Странань инь цебярь специалисттнень лувксса Гигиенань и эпидемиологиянь республиканскяй центрань 7 сотрудницатне казьфт од государственнай казнеса – Пироговонь орденца.

Владимир Волков китькстазе, што минь медучрежденияньконди удалась пуроптомс лекарствань, оборудованиянь и араламань средствань цебярь запас. Тя тевса активнай участия примасть «Фармациянь» специалисттне. «Биохимик» заводса медучреждениятнень и Мордовскяй университетть ширень кирдемаснон вельде аноклафоль коронавирусть пчкафнеманкса од препарат. Россиянь Минздравсь сувафтозе «Арепливирть» ся лекарстватнень лувксс, конат азфт коронавирусть пчкафнеманкса. «Азитромицин» антибиотикть мархта ряцок, кона стане жа ноляви «Биохимикса».

Региононь вятись макссь оцю оценка медицинскяй сообществать и властень оргаттнень марстонь работаснонды. «Минздравти удалась пяшкодемс аф теждя задачат. Тя сатовсь пчксемань учреждениятнень главнай врачснон и коллективснон мархта марстонь работань вятезь, сембе кизефксне решандакшневсть курокста и профессиональнайста.

Тяконь азозь пульмонологияса ведущай российскяй специалисттне, конат сашендсть республикав консультациянь етафтома. Москувонь специалисттне азозь, што минь враченьконь и медучрежденияньконь работасна отвечай тяниень пингонь сембе вешфксненди.

Владимир Волков азсь седиста моли ризнамань валхт сембонди, кие юмафтозень мала ломанензон, ялганзон. «Синь афкуксонь геройхть, конат педа-пес пяшкодезь эсь долгснон. Минь мархтонт задачаньке ванфтомс синь лемснон и тевснон, кирдемс кулофнень семьяснон ширеснон.

И, конешна, эряви тиемс сембось, штоба ванфтомс ся медицинскяй работникнень, конат лядондыхть передовойса. Маластонь пингть сталмотне медицинать лангс кармайхть оцюфт. Инголе минь мархтонт нинге лама работада. Но шарьхкотьф, што од тюремас минь листяма сяда кемокс, од опыт и содамоши мархта. Сяс именна тячи тейне ульсь пяк важна васедемс мархтонт лична и седи вакска спасибамс теенть профессионализманкса, ответственнайкс улеманкса и оцюдонга оцю работанкса».

Казнет тя шиня максфтольхть здравоохранениянь сферань, санитарно-эпидемическяй безопасностень службань работникненди, специалисттненди и волонтерхненди, конат примасть участия коронавируснай инфекциять каршес тюремаса. Сембоц казьфоль пцтай нильгемонь ломань.

Мордовия Республикань Оцюнять Указонц мархта здравоохраненияса заслуганкса и коронавируснай инфекциять ( COVID-19) каршес тюремати личнай путксонкса Славань III степенень орденца казьфт – Мордовия Республикань здравоохранениянь министрсь Олег Маркин и Республиканскяй инфекционнай клиническяй больницянь главнай врачсь Сергей Чванов. Сергей Евгеньевич работай ялганзон и здравоохранениянь сферань сембе работникнень лемста спасибась республикань Оцюняти пандемиять каршес ащемста ширень кирдеманкса и лезксонкса. Сон стане жа азозе, што аф ваномок сянь лангс, што коллективсост лама пенионерда, эпидемиять пингста кивок эздост ашезь ту больничнайс, сембе ащесть передовойса. Сергей Чванов китькстазе, што федеральнай и республиканскяй бюджетонь средстватнень лангс, конат нолдафтольхть пандемиять каршес тюремста, удалась ламода кемокстамс Инфекционнай больницять материально-техническяй базанц: «Сембось тя нолдави тевс, штоба максомс цебярь медицинскяй лезкс республикань эряйхненди».

«Мордовия Республикань Заслуженнай врач» почетнай званиясь максф Ольга Македонскаяти, веронь переливаниянь Мордовскяй республиканскяй станциянь главнай врачти. «Мордовия Республикать виияфнеманцты личнай путксонкса» Мордовия Республикань Оцюнять почетнай знаксонза казьф Ольга Портова – Республиканскяй противотуберкулезнай диспансеронь эпидемиологиянь отделть вятиец, врачсь-эпидемиологсь.

Мордовия Республикань Почетнай грамотат – Сергей Сяткинонди, С.В.Катковонь лемса Республиканскяй клиническяй больницянь приемнай отделениянь врачти и Татьяна Федотовати, Республиканскяй инфекционнай клиническяй больницянь реанимациянь и интенсивнай терапиянь отделениянь медицинскяй сестрати.

Коронавируснай инфекциять каршес тюремати оцю путксонкса Мордовия Республикань Оцюнять Благодарностьса казьфт Н.П.Огаревонь лемса Мордовскяй государственнай университетонь студенттне Анастасия Балахонскаяти, Владислав Бибиковонди и Елена Назаровати.

Стане жа Мордовия Республикань Оцюнять Благодарностьса казьф Н.П.Огаревонь лемса Мордовскяй госуниверситетонь анестезиологиянь и реаниматологиянь кафедрань ассистентсь Павел Замышляев – «Волонтеры медики» Мордовскяй региональнай отделениять региональнай координатороц, экстреннай ситуацияса эряфкшу ломаттненди лездомать коряс региональнай волонтерскяй штабть вятиец. Мордовия Республикань Оцюнять Благодарностьса казьф Евгений Козлов – Н.П.Огаревонь лемса Мордовскяй госуниверситетонь общественнай шумбрашинь и здравоохранениять ладяманц коряс курс мархта амбулаторно-поликлиническяй терапиянь кафедрань старшай преподавательсь. Преподавательсь работась университетонь карантиннай общежитияса пандемиять ушедомста.

Торжественнай мероприятиять шумордамста Мордовиянь Оцюнясь Владимир Волков седи ваксста спасибась пуромфненди. «Оцю сюкпря теенть и тинь коллективонтенди эсь прянь аф ужялязь трудендаманкса и тежятть аралаф эряфонкса! Арьсян сембонди кеме шумбраши, цебярьс надияма, мир и цебярь эряф!»

 

Мордовия Республикань Оцюнять пресс-службац