Владимир Волков: «Од ломаттне должетт улемс конкуренциянь кирнихть сембоса: образованияса, научно-техническяй творчестваса, спортса»

Владимир Волков: «Од ломаттне должетт улемс конкуренциянь кирнихть сембоса: образованияса, научно-техническяй творчестваса, спортса»

12 июльста, Мордовия Республикань Оцюнять аф оцю пингс тевонзон тиендисна В.Д.Волков ульсь «Инерка-2017» Межрегиональнай образовательнай форумса, кона ащи Больщеберезниковскяй районца «Специальное управление гражданской защиты» ГКУ-ть видеса.

«Инерка-2017» форумсь тядде етафтови кафксоцеда. Сонь участникокс арасть 14-30 кизоса од ломаттне аф аньцек Мордовияста, но и лия регионцта. Етксост од ломанень движениянь, общественнай организациянь и объединениянь, ученическяй и студенческяй самоуправлениянь органонь, од ломанень парламентонь, волонтерскяй организациянь представительхть. Сембоц пцтай 700 ломань.

Инжихне содафтсть форумонь сменатнень мархта. Ушедсь экскурсиясь-презентациясь «Российское движение школьников» сменать ваномаста, коза сувасть «Юнармиянь» и «Поиск» отрядонь боецне, тяфта лемдеви од Кулибиттне, школьнай СМИ-тнень вятисна. Меле корхнефоль «Студенческое самоуправление», «Политика» и «Молодежные инициативы» сменань участникнень мархта. Мекольцеса В.Д.Волков содафтсь сменань участникнень проектснон мархта, конатнень лангса синь работасть форумонь- берьф. Од ломанень аф комерческяй организациянь представительхне няфтезь социальнай ширде эрявикс проектснон, конат сотфт туризмать, велень хозяйствать, патриотизмать мархта. Башка мяль республикань вятись шарфтсь велень хозяйствань отраслять виияфнеманцты.

—Агропромышленнай комплексть виияфнемац фалу ульсь и лядонды васенце вастса республикань руководствать работаса,—мярьгсь В.Д.Волков.—Грамотнай, лац-ряц ладяф работать, од технологиятнень тевс сувафнемаснон эзда ащи ломаттнень эряфсна, сяс инновационнай проекттне тя отрасляса арсихть коль сяда вешевикс.

«Волонтеры чемпионата» площадкаса Владимир Волков васьфтсь Россияса FIFA 2018 футболть коряс Миронь чемпионатонь ошть-организаторть – Саранскяйть посолонц, содаф российскяй футбольнай коментаторть Илья Казаковонь мархта.

Корхнемок волонтерхнень мархта Владимир Волков китькстазе, што синь работаснон эзда пяк ламось кармай ащема мундиалень шитнень, тяконь лувксса, кодамот мяльсна арьсемасна кармайхть омба масторонь болельщикнень республиканьконь колга.

Важна аф аньцек лац васьфтемс инжихнень, но и анокламс культурнай программа, улемс инжихнень ваксса сембе пингть. Сяс эрявикс лац содамс омба масторонь кяльхнень, - китькстазе Владимир Волков. – Саранскяи сай 100 тежяньда лама ломань. Саранскяйсь теест должен мяляфтовомс кода инжиень примай и эсь лацонь ош. Сембось должен улемс анолаф инь оцю уровеньца». Отвечамок «ИНТВ» проектть вятиенц О.Клюевать кизефксонзон лангс, региононь лидерсь китькстазе:

—Лагери пуромсть асу од ломатть, конат анокт азондомс эсь разработакаснон колга. Минь арьсетяма кирдемс стирьхнень-цератнень ширеснон, нолнемок средстват ламонь надияфты проекттненди, сятненди, конат вешевихть тячиень эряфть мархта.

Инжихне примасть участия торжественнай мероприятияса, кона лемтьфоль Проектонь од ломанень фестивальти. Казнет и премият получасть лагерень инь цебярь участникне.

—Республикань руководствати пяк эрявикс, што тяфтама форумса од ломаттне получсихть од содамошит,—азозе В.Д.Волков.—Тячи од стирьхненди-цератненди эряви улемс конкуренциянь кирникс сембоса—образованияса, научно-техническяй творчестваса, спортса. Путнеда инголент задачат и венемода синь пяшкодемаснонды, а минь эсь ширденк тисаськ семботь, штоба тинь получаледе эрявикс маштомошит и араледе эсь Родинань афкуксонь патриоткс.

Мероприятияса стане жа примасть участия Од ломаттнень тевснон коряс Федеральнай агентствань региональнай взаимодействиянь Управлениять начальникоц Кирилл Литвицкий, «Российскяй союз сельской молодежи» од ломанень общероссийскяй общественнай организациять Центральнай Советонц председателец Юлия Оглоблина, Мордовиянь законодательнай и исполнительнай властень представительхне, МР-нь Общественнай палатань члеттне и лият.

Тяка шиня МР-нь Государственнай Собраниять видеса Од ломанень общественнай палатань члеттне етафтозь Молодые» политики» дискуссионнай клубть заседаниянц, конань пингста васьфнесть Мордовия Республикань Госсобраниять Председателенц Владимир Чибиркинонь мархта.