Лямбирьса етась «Сабантуй» XIII республиканскяй национально-фольклорнай праздниксь. Эсонза примась участия Мордовиянь вятись Владимир Волков. Илать панжемста сон пшкядсь пуромфненди рузонь и татаронь кяльса: «Дорогие друзья! Кадерле дуслар!» Сон отмечазе, што Сабантуйть пингста чествондакшнесазь мода лангса работайхнень, велень хозяйствань передовикнень, кинь трудснон эзда ащи урожайсь, кит обеспечендакшнесазь республикать благополучиянц. Владимир Волков азсь благодарностень валхт сембонди, кие кепсезе и кемокснезе Лямбирскяй районть, кие тячи сатни оцю результатт велень хозяйствань и промышленнай производстватнень эса.
«Сабантуйсь ульсь и лядонды трудти кельгомань праздникокс. Аньцек трудть мархта сотфт сембе тевоньке и сатфксоньке, инголи аськоляманьке!
Тячи пара няемс, што илас пуромсь лама од ломаньда. Сембось, мезе тиендеви миньцонк мекольдень пингть – ошнень и велетнень благоустройствасна, эряма васттнень, китнень, культурнай и развлекательнай центратнень, тяниень пингонь предприятиятнень строямасна – тя тиендеви теенть!
Тячи минь дивандакшнетяма татарскяй народть культуранцты, историянцты и коензонды-обуцянзонды. Сембонди тейнек ламос мяляфтовихть седиень токай моротне, спортсметтнень мастерствасна и вийсна.
Кеняртьфти, што праздникса марса пуромсть разнай кизонь, национальностень и верондамань ломаттне. Тячи инжиень примай лямбирскяй модать лангс састь инжихть республиканьконь разнай уженянзон эзда, а стане жа Татарстанонь, Нижняй Новгородонь и Пензань делегациятне. Минь сотнекшнесамазь лама кизонь ялгаксшись и сотрудничествась. Пара койс коре делегациянтень участвондамасна козякофнесы илать.
Тейнек пяк питни лама национальностень семьясонк ладямась. Минь марятама гордость, мес Мордовиясь няфни цебярь пример нароттнень еткса кеме ладямать коряс. Русне, мокшэрзятне, татархне марса решандакшнесазь социально-экономическяй вииякшнемань кизефкснень, марса кеняртькшнихть и ризносихть, марса отмечсесазь эсь национальнай иласнон. Именна тянь вешсы эздонк историясь, атяньке-бабаньке.
Мзярда мархтонокт историческяй коеньке-обяцяньке, национальнай иланьке, минь сяда кемоста ащетяма модать лангса, сяда парста трудендатама, кемазь ваттама вандыень шити», - мярьгсь Владимир Волков. Велень хозяйствать виияфнеманц коряс Мордовиясь сувси странань инь цебярь региоттнень лувксс. Фкя эряйть лангс меля нолдафоль 359 килограмма сиволь, 425 килограмма лофца, 1700 ал. А Лямбирскяй районць сатсь республиканскяйхнень коряс сяда оцю результатт: нолдаф 2300 тонна лофца, 696 килограмма сиволь, региононь алхнень пялесна.
Илань участникнень поздравляндазь Татарстанцта инжихне. Сабантуйса Лямбирса ульсь Татарстанонь Кайбицкяй райононь делегациясь. Татарстань Республикань Госсоветонь депутатсь Рауиль Рахматуллин отмечазе, што Россиянь кафта региоттнень еткса экономическяй и культурнай сотксне коль кемокснихть. Братскяй кафта республикатненди ули мезти тонафнемс фкя-фкянь эзда.
Мордовиянь татархнень «Якташлар» Региональнай национально-культурнай автономияснон председателец, республикань Госсобраниянь депутатсь Рафаиль Аширов отмечазе, што аш мезевок сяда питни Мордовиянь нароттнень еткса ладямать, фкя-фкянь ширень кирнемать коряс, а Сабантуйть марса праздновандамац кемокснесы тя ладямать сядонга пяк. Республикась заботендай тяса эряй эрь народть культуранц, кяленц и национальнай традициянзон ванфнемаснон колга. И республикань татархне фалу шарьхкотькшнезь ширень кирдемать, конань теест макссесы региононь руководствась целайнек и лична Владимир Волков.
Лямбирскяй райононь оцюнясь эряйхнень лемста азсь благодарностень валхт республикань вятити Владимир Волковонди заботендаманкса, конань эрь шиня шарьхкотькшнесазь-марьсесазь районца, экономикать и социальнай сфератнень виияфнемасост лезнеманкса. Тяфтама илатне кемокснесазь нароттнень еткса ялгаксшить.
Республикань творческяй коллектифне казезь пуромфненди эсь мороснон-кштимаснон. А Сабантуень главнай участникокс арасть производствань передовикне, конатненди казьфтольхть республиканскяй оцю казнет.