Владимир Волков примась участия совещанияса, кона лемтьфоль республикаса Святой праведнай воинть Ушаковонь кизонц пажеманцты

21 февральста Мордовиянь Оцюнясь Владимир Волков примась участия торжественнай мероприятияса, кона лемтьфоль республикаса Святой праведнай воинть Ушаковонь кизонц панжеманцты. Пуромкссь етась И.М.Яушевонь лемса Государственнай музыкальнай театраса.

«Минь правас коре и гордостень марязь азонкшнесаськ Российскяй флотонь легендарнай адмиралть землякокс. Федор Ушаковонь тевонза служасть и служайхть од поколениять, Отечествань сембе аралайхнень патриотическяй воспитанияснонды, - мярьгсь МР-нь Оцюнясь. Нинге эрямстонза адмиралсь музе народть башка кельгоманц и уважениянц».

Ушаков 40-да лама баталияса ашезь кирде фкявок поражения. Сонь командованиянц ала ашель юмафтф фкявок корабль, фкявок матрос ашезь пова врагть пленозонза. Васенце награданц Федор Ушаков получазе чумать каршес тюреманкса и эсь матросонзан колга заботендамань няфтеманкса.

«Адмиралсь арась русскяй морякнень мужестваснон и кемошиснон символкс, праведностень примеркс. Сембе сонь эряфоц тонафнесамазь минь фкянди – нльне эста, мзярда аф кирдевомшка стака, главнайсь, лядондомс ломанькс, улемс вернайкс Родинати и присягати», - отмечазе Владимир Волков.

Мордовиянь эряйхненди Федор Ушаков башка мала. Именна мокшэрзянь масторть сон кочказе мекольце эряма вастокс. Эсь средстванзон лангс сон панчсь Темникавса госпиталь, тись лама пожертвования 1812 кизонь Отечественнай войнать пингста. Калмамс эсь прянц Ушаков мярьгсь Санаксарса, мокшэрзянь масторса.

«Сембе пингс мяляфтовикс арайхть республикань эряйхненди оцю торжестватне, конат сотфтольхть адмиралть Феодор Ушаковонь канонизациянц мархта. Меля топодсь 15 киза тя историческяй событиять эзда. 2001 кизонь августста Темников ошсь арась православнай миронь духовнай центракс.Канонизациянь церемониять вятезе тяниень Москувонь и сембе Русень Патриархсь Кирилл. Торжестватнень эса примасть участия 7 тежяньда лама ломанць, - азозе МР-нь Оцюнясь. – Оцю казнекс Мордовиянь эряйхненди Федор Ушаковонь лемс Саранскяй Кафедральнай Соборть строямац. Тя тевсь тифоль марса, лезкс макссть тежятть эряйсь, ламоц предприятиятне и бизнесметтне».

Владимир Волковонь валонзон коряс, Темникаваса арьсекшневи путомс Федор Ушаковонди памятник, сонь лемсонза музейса панжемс од залхт и экспозицият.

«Республикань Правительствась аноклась мероприятиянь план, конат лемдевихть адмиралть лятфнемста 200 кизонь топодемати. Оцюшка пялькссна етафтови октябрьста. Арьсекшневи етафтомс несколька всероссийскяй научно-практическяй, конат лемтьфт Ушаковонь наследиянцты. Севастополи пачфтеви адмиралть мощанзон пялькскяснон мархта шкайнясь, а Херсонесса пуроптови крестнай ход», - поладозе Владимир Волков.

Кизоньботмоста кармай етафневома лама тематическяй выставка и презентация.

2018 кизонь футболть коряс миронь чемпионатти нолдави памятнай монета, конань лангса кармай няфтьф республикать столицанц инь оцю достопримечательностец – святой праведнай воинть ФФеодор Ушаковонь Кафедральнай Собороц.

Мордовиянь Оцюнясь азсь благодарностень валхт»Звезда» телеканалть сембе команданцты, сембонди, кие примась участия фильмать анокламаса, кона лемтьф адмиралти, стане жа актерти Андрей Мерзликинонди.

Пуромфнень инголе стане жа корхтасть Саранскяй и Мордовскяй митрополитсь Зиновий, «Звезда» РФ-нь Вооруженнай виень телерадиокомпаниять генеральнай директоронц маркетинкть коряс заместителец Алена Сластенина, Россиянь Вооруженнай виень генеральнай Штабонь Академиянь военнай историянь НИИ-нь старшай научнай сотрудниксь Владимир Овчинников, «Звезда» телеканалса «Военная приемка. След в истории» проектть генеральнай продюсероц Оксана Матвеева, проектть ведущаец и вятиец Алексей Егоров.

Торжественнай мероприятиять рамкаса няфтьфоль «Ушаков – адмирал Божьей милостью» фильмась.