Шуваланяста, 12 июльста, ульсь Мордовиянь Оцюнять Владимир Волковонь РМ Рейлть генеральнай директоронц Павел Овчинниковонь мархта васедемац. Корхтамась мольфтевсь васенце пяле кизоть работань итокнень колга, а стане жа од проекттнень эряфс етафнемаснон квалма.
Павел Овчинников азондсь региононь вятити сянь колга, што васенце пяле кизоть РМ Рейлть вагононь производствань объемтне етасть ни 3500 единицать вельфкя, 2017 кизоня кизоньберьф нолдафоль 4232 вагон. Стане жа мекольце ниле кизотнень РМ Рейлса 2,5-крда кассь литьять производствац. 2018 кизонди путневи задача анокламс 7000 вагонокомплект, сяда тов мольфтеви работась автопроизводительхнень мархта.
Фкя инь васенце «вагоннай» проектокс лядондыхть полуваготтнень, метанолонь, постнай ваень, нефтехимическяй сталмонь, удобрениянь, солянай кислотань усксеманкса цистернатнень, хопперхнень-цементовоснень и зерновоснень нолнемасна. Анок од, высокотехнологичнай 80-футовой платформать опытнай образецоц. Ня контракттнень пяшкотькшнеманкса РМ Рейлсь мольфти оцю рекрутинговай кампания – панчф рабочай специальностень примамась, работайхть тонафты программат. Компаниять социальнай пяльксонц республикань Оцюнясь отмечазе башка, китькстамок, што сон эрявикс кода и производственнай результаттне.
Стане жа рабочай васедемать пингста ванфтольхть кизефксне, конат сотфт уликс контракттнень пяшкотькшнемаснон и экспортнай ширеть виияфнеманц мархта. 2018 кизоня продукциять пяльксоц, кона нолдаф предприятияса омба масторонь рынкатненди, кармай марстонь объемть нилеце пяльксонц коряс сяда оцю.
Корхтамаса примасть участия МР-нь Правительствать Председателенц васенце заместителец – экономикань, торговлянь и предпринимательствань министрсь Владимир Мазов, МР-нь Правительствать Председателенц
заместителец – промышленностень, наукань и од технологиянь министрсь Александр Седов.
Азсаськ, што васедемась етась Металлургонь шить карша, кона тя кизоня повсь марса ВКМ-Сталень РМ Рейл литейнай заводть 50 кизонь топодеманц мархта. Владимир Волков азсь предприятиянь коллективть лемс поздравлениянь валхт и арьсесь сяда товолдонь сатфкст.
Мордовия Республикань Оцюнять пресс-службац