Владимир Волков ванозе «Новотроицкое» аграхолдингть паксянзон лангса уборочнай тефнень вятемаснон

Владимир Волков ванозе «Новотроицкое» аграхолдингть паксянзон лангса уборочнай тефнень вятемаснон

Пяденцяста, 15 сентябрьста, шить омбоце пялестонза Владимир Волков ванозе Старошайговскяй районца «Новотроицкое» агрохолдингть паксянзон лангса уборочнай тевнень вятемаснон.

Предприятиять вятиец Владимир Руженков азондсь республикань лидерти сатф велень хозяйствань результаттнень колга. Агрохолдингть хозяйстванзон эса урядаф ни 3200 гектар сера, тя площаттнень 98 процентсна. Урожайностсь средняйста 44 центнер гектарста, тя сяда лама мелянь кизоть коряс. Паксятнень лангса работай 11 уборочнай техника, тяконь лувксса «Полесье» кафта од комбайнат. Механизаторхнень эзда фкять мархта Владимир Волков корхнесь тозеронь паксять кучкаса.

Механизаторсь Андрей Буткин сась Новотроицкяи вейхкса кизода инголе эсь семьянц мархта, коса касфтовихть колма шабат. Мархтост ряцок тяза сась и сонь дуганоц эсь семьянц мархта. Кафцьке семьятне получасть жилищнай субсидият, эстокиге сувасть од кудс, конань площадец 70 квадратнай метрада лама. «Коттедженконь питнец 2,5миллион цалковай. 1,3 миллион цалковень лувксса жилищнай субсидияти нинге 1,2 миллион цалковай тейнек макссь холдингть руководствац, конань мархта минь кемокстаф соглашенияньке – работамс хозяйстваса аф 15 кизода кржа», - азозе Владимир Волковонди механизаторсь. И поладозе: «Работамань и эрямань условиятне тяса цебярьхть. Зарплатась стане жа цебярь, средняйста 40-60 тежянь цалковай, рьвязевок работай агрохолдингса, эряма вастоньке ули, шабатне идень саду, школав якайхть – сембось цебярь!»

Новотроицкяйть социальнай инфраструктурац мекольдень кизотнень ламода полафтсь цебярь шири, кода и республикань ламоц велетнень эса. Ламода тяса сатовсь велень территориятнень виияфнемань федеральнай целевой программать эряфс етафнеманц вельде. Тя пингста велетнень эса эрямань условиятнень цебярьгофнеманкса нолдаф 10 миллиартт цалковай. Новотроицкяень комплекснай застройкань объекттненди сувсихть идень од сад, школа, социальнай центра, тяниень пингонь стадион, ФАП,

соцкультбытонь лия объектт, а стане жа од кит и благоустроендаф ваймосема вастт. Но главнайсь, тяса стройсевихть эряма вастт – мекольдень 12 кизоста Новотроицкяйса 46 куд агрохолдингонь рабочайхненди. «Тяниень пингть ширезон эряма анокт етамс 16 семьясь – Нижняй Новгородста, нльне Ханты-Мансийскяйста!» - пачфтезе республикань лидерти агрохолдингть вятиец. Владимир Волков надияфтсь кирдемс велень хозяйствань предприятиять мялензон-арьсеманзон ширеснон: «Сяда товга карматама стройсема велеса эряма вастт, петнемонза тястонь инфраструктурать, а работама вастт Мордовияса сембонди сатыхть!».

15 сентябрти республикаса урядаф зерновойхнень и зернобобовайхнень 84 процентсна, яжаф 1 миллион 180 тежянь тонна сера. Урожайностсь – 33, центнер гектарста. Ушедсь якстеряпсть урядамац, озимойхнень видемасна шумордаф 70 процентта.

Мордовия Республикань Оцюнять Пресс-службац